Dünýä futbolynyň çür depesi hasaplanýan “El Klasiko” duşuşygynyň nobatdaky oýny ertir 10-nji aprelde, ýarygije, has takygy, Aşgabat wagty bilen 00:00-da başlar. Madridde oýnaljak oýunda “Real” “Barselonany” kabul eder. Bu olaryň “La Ligadaky” 182-nji duşuşygy bolar. Şol oýunlarda “Real” 74, “Barselona” 72 gezek ýeňiş gazandy (35 deňlik). Ýeňiş gazanan toparyň “Atletiko” utulan ýagdaýynda 1-nji orna çykmak mümkinçiligi bar. Duşuşyk “Türkmenistan sport” teleýaýlymy arkaly göni ýaýlymda halk köpçüliginiň dykgatyna ýetiriler. Duşuşykda “Real Madridiň” kapitany Serhio Ramosyň şikesi sebäpli oýnap bilmejekdigini hem ýatladalyň. “La Ligada” sanawyň lideri “Atletiko” 11-nji aprelde myhmançylykda “Betis” bilen duşuşar (00:00). Bu oýun hem “Türkmenistan sport” teleýaýlymynda görkeziler.
Angliýanyň çempionatynda 31-nji tapgyryň merkezi oýnunda Žoze Mourinio ozalky toparynyň garşysyna meýdança çykar. 11-nji aprelde boljak “Tottenham”–“Mançester Ýunaýted” duşuşygy 20:30-da başlar. “Premier Ligadaky” ýene bir esasy oýun ertir, 10-njy aprelde “Liwerpul” bilen “Aston Willanyň” arasynda oýnalar (19:00). 2021-nji ýyla geçip, öz meýdançasynda ýeňiş gazanyp görmedik “Liwerpul” möwsümiň 1-nji oýnunda “Aston Willadan” taryhy hasap bilen, 7-2 hasabynda ýeňlipdi. Öňdebaryjy “Mançester Siti” bolsa, ertir, şenbe güni “Lids Ýunaýtedi” kabul eder (16:30). Tapgyryň ýene bir esasy oýnunda-da 3-4-nji ýerlerdäki iki toparyň özara oýny bolup, “West Ham” bilen “Lester Siti” Londonda duşuşarlar (11-nji aprel, 18:05).
Italiýanyň çempionatynda çempionlyga barha golaýlaýan “Inter” “Kaliari” bilen (11-nji aprelde, 15:30), “Milan” myhmançylykda “Parma” bilen (10-njy aprelde, 21:00), “Ýuwentus” bolsa “Jenoa” bilen duşuşar (11-nji aprelde, 18:00). 3 duşuşyk hem “Türkmenistan sport” teleýaýlymynda görkeziler.
Germaniýanyň “Bundesligasynda” “Bawariýa” Münhende “Union Berlini” kabul eder. Şenbe güni 18:30-da başlanjak duşuşyk “Türkmenistan sport” teleýaýlymynda ýaýlyma berler. Tapgyryň iň esasy oýnunda 3-4-nji orunlardaky toparlaryň duşuşygy bolup, “Wolfsburg” myhmançylykda “Aýntraht” bilen duşuşar (10-njy aprel, 18:30). Şenbe güni oýnaljak oýunlaryň ýene biri-de “Ştutgart” bilen “Borussiýa Dortmundyň” arasyndaky oýundyr (10-njy aprel, 21:30).
“Türkmenistan sport” teleýaýlymynda görkeziljek duşuşyklar
9-njy aprel
Mets – Lill (00:00)
10-njy aprel
Milwall – Swansi (16:30)
Bawariýa – Union Berlin (18:30)
Parma – Milan (21:00)
Real Madrid – Barselona (00:00)
11-nji aprel
Inter – Kaliari (15:30)
Ýuwentus – Jenoa (18:00)
Roma – Bolonýa (21:00)
Betis – Atletiko (00:00)
