Azerbaýjanyň “Premier Ligasynda” çempion 7 ýyldan soň üýtgedi. Möwsümiň jemleýji, 28-nji tapgyrynda çempionlygyň iki dalaşgäri “Neftçi” bilen “Karabag” toparlary duşuşdy. Ýer eýeleri çempionlyk üçin ýeňiş gazanmaly, myhmanlara deňlik hem ýeterlikdi. Çekeleşikli geçen oýnuň ýer eýeleri ýeňiş hem-de çempionlyk goluny 90-njy minutda geçirýär. A. Ahmedowyň ýeke-täk goly bilen ýeňiş gazanan bakulylar 7 ýyldan soň 9-njy çempionlygyny baýram edýär.
Ilkinji çempionlygyny 1993-nji ýylda gazanan we 2014-nji ýyldan bäri-de yzly-yzyna 7 gezek altyn medaly eýelän “Karabag” 4-nji gezek kümüş medal bilen oňňut etmeli boldy.
Şunlukda, täze möwsümde Çempionlar ligasynyň saýlama tapgyryndan gatnaşyp başlajak “Neftçi” 9-njy gezek çempion bolup, bu ugurda rekordyň ýeke-täk eýesi boldy. Mundan ozal, iki topar 8 çempionlyk bilen rekordy paýlaşýardylar.
