Transfer möwsüminiň tamamlanmagyna sanalgyja gün galanda, ýene-de azy ýaran transfer wakasynyň bolmagy ähtimal. Lionel Messiniň Barselona bilen şertnama baglaşyp bilmän gaýtmagy şu tomsuň, hatda futbolyň taryhyndaky iň uly transfer wakalarynyň biri bolupdy. Ýöne şeýle transfer wakalarynyň hataryna ýene biriniň goşulmagy mümkin. Başgaça aýdylanda, ilki Ronaldonyň, soňra Messiniň başga çempionatlara geçmeginden soň, super ýyldyzsyz galan La Liganyň bu super ýyldyzsyz ýagdaýy uzaga çekmejek ýaly.
Ispaniýanyň meşhur sport neşiri Marca gazetiniň habar bermegine görä, Kilian Mbappe Real Madride transfer bolmaga golaý. Mundan öňkülerden has golaýdygy aýratyn nygtalýan habarda 22 ýaşyndaky fransuz futbolçysynyň PSŽ tarapyndan hödürlenen ähli tekliplerden ýüz öwrendigi bellenilýär. Mbappe toparyň we daş-töweregiň gysyşyna garamazdan, PSŽ-niň 5+1 ýyllyk teklibini kabul etmedi.
Geljek ýylyň tomsunda PSŽ bilen şertnamasy tamamlanýan Mbappeniň erkin agent ýagdaýynda gitmezligi üçin PSŽ-niň ýyldyz futbolçyny şu möwsümde transfere goýmagy zerur. Bolmasa, ol hem edil häzirki topardaşy Lionel Messi ýaly mugt Real Madridiň oýunçysy bolar.
