Angliýanyň Premier Ligasynda Liwerpul myhmançylykda Klaudior Ranierini tälimçilige bellän Watford toparyny 5-0 hasabynda ýeňdi. Duşuşykda 9-njy minutda Mane, 37-nji, 52-nji we 90+1-nji minutlarda Firmino hem-de 54-nji minutda Salah tapawutlandy. Duşuşykda 1 gol geçiren Sadio Maneniň Premier Ligada geçiren gollarynyň sany 100-e ýetdi. Ol Premier Ligada muny başaran 3-nji afrikaly futbolçy boldy. Ondan öňde 104 golly Didie Drogba bilen topardaşy Mohamed Salah bar. Mane Premier Ligada 100 gol geçiren 31-nji oýunçy boldy. Şeýle-de Mane şol gollaryň hiç birini-de penaltiden geçirmedi. Ol Premier Ligada 100 we 100-den köp goly penaltisiz geçiren 3-nji futbolçy hökmünde hasaba alyndy. Ondan öňde 149 gol geçiren Les Ferdinand bilen 110 gol geçiren Emil Heski bar.
