UEFA Çempionlar Ligasynda Kristiano Ronaldo Mançester Ýunaýtediň düzüminde şu möwsümde 3 duşuşykda-da meýdança çykyp, üçüsinde-de tapawutlanmagy başardy. Soňky 2 duşuşygynda ýeňiş getiren futbol bolan Ronaldonyň Çempionlar Ligasyndaky gollarynyň sany 137-ä ýetdi. Ol UEFA-nyň klub bäsleşiklerinde umumylykda saýlama tapgyrlaryny-da hasaba alanyňda, 187-nji gezek meýdança çykyp, bu babatda Iker Kasilýasyň rekordyny täzeledi.
Ronaldo geçiren 137 goluny 38 toparyň derwezesinden geçirdi. Italiýanyň Atalanta topary onuň gol geçiren 38-nji kluby bolup, ol bir günden soň rekordy ýene-de öz adyna geçirdi. Sişenbe günki oýunlardan soň Lionel Messi rekorda şärik bolupdy. Bu barada saýtymyzda-da giňişleýin habar berlipdi. Ýöne bir günden soň rekord ýene-de portugaliýaly ýyldyza geçdi.
Iň köp Ýuwentusyň derwezesinden gol geçirdi
Şeýlelikde, Ronaldo UÇL-de APOEL, Arsenal, Atletiko, Atalanta, Aýaks, Oser, Barselona, Baýer, Bawariýa, Bazel, Çelsi, Kopengagen, SSKA Moskwa, Borussiýa D, Ferenswaroş, Galatasaraý, Inter, Ýuwentus, Dinamo Kiýew, Liwerpul, Ludogores, Malmö, Lion, Mançester Siti, Mançester Ýunaýted, Marsel, Milan, PSŽ, Porto, Roma, Şalke, Şahtýor Donesk, Wilýarreal, Ýang Boýz, Sporting, Tottenham, Sürih, Wolfsburg klublarynyň derwezesinden gol geçirdi. Ol ozalky kluby Ýuwentusyň derwezesine 10, Aýaksdyr Bawariýanyň toruna 9, Atletiko Madridiň hem-de Borussiýa Dortmundyň derwezesine 7 pökgi girizdi.
