Dünýäniň ykdysady taýdan öňdebaryjy ýurtlarynyň hem-de halkara guramalaryň ýolbaşçylarynyň gatnaşmagynda “G20 Liderler” sammiti geçirildi. Italiýanyň paýtagtynda geçirilen ýygnagyň birinji gününde “Global Ykdysadyýet we Global Saglyk” atly mejlisde pandemiýa döwründe ykdysady dikeliş, sanjym kampaniýasy we pandemiýa döwründe ýüze çykan käbir meselelere garaldy. Dünýäniň ösen ýurtlarynyň ýolbaşçylary edara-kärhanalaryň girdejilerini “salgytsyz sebitlerde” goýmaklarynyň öňüni almagy maksat edinýän “Global iň pes girdeji salgydy” düzgünini tassykladylar. Şeýle hem ýygnakda ykdysady taýdan ösmedik ýurtlar üçin has köp “Covid-19“ sanjymy üpjün etmegi kabul edildi.
Bu ylalaşykda “Google”, “Amazon”, “Microsoft” we “Facebook” ýaly internet kompaniýalary bilen bir hatarda global derejede iş alyp barýan kompaniýalardan 2023-nji ýyldan başlap 15 göterim salgyt tölemegi göz öňünde tutulýar.
Ykdysady Hyzmatdaşlyk we ösüş guramasy (OECD) geçen aýyş başynda köpmilletli kompaniýalaryň iş alyp barýan ýurdunda 2023-nji ýyldan başlap, azyndan 15 göterim möçberinde salgyt alynmagy baradaky ylalaşygy dünýäniň 136 ýurdy tarapyndan kabul edilendigini habar beripdi.
Sammitde global maýylganlygyň öňüni almak üçin durmuşa geçirilmeli maksatnamalar barada hem pikir alşyldy.
