Ispaniýanyň çempionaty La Ligada iki duşuşykda 6 gol geçirilip, ikisinde-de ýeňiş gazanan bolmady. Has takygy 3 gol geçirip, öňde barýan iki güýçli klub hem 90+6-njy minutda geçirden gollary bilen meýdançany başlary aşak terk etdiler. Barselona myhmançylykda Selta bilen duşuşyp, 1-nji ýarymda Fati (5), Buskets (18) hem-de Depaýyň gollary bilen 3-0 öňe saýlandy. Ýöne 2-nji ýarymda erjel oýun görkezen Selta 3 gol geçirdi. 52-nji minutda Ýago Aspas, 74-nji minutda Nolito hem-de toparyny ýeňlişden halas eden goly 90+6-njy minutda ýene-de Ýago Aspas derwezä girizdi.
Edil şonuň ýaly netije bilen tamamlanan Walensiýa-Atletiko duşuşygy madridliler üçin has dramatik ýagdaýda gutardy. 35-nji minutda Luis Suares hasaby açdy. 50-nji minutda-da Sawiçiň öz derwezesinden geçiren goly bilen hasap deňlendi. Oýnuň 58-nji minutynda Grizmann, 60-njy minutynda-da Wrsalko aratapawudy 2-ä çykardy. 85-nji minutda oýna giren Hugo Duro 90+2-nji hem-de 90+6-njy minutlarda tapawutlanyp, hasaby deňlemegi başardy. Şeýlelikde, Atletiko agza-burna gelen 3 utugy 90-njy minutdan soň 2 gol geçirdip, elden giderdi.
La Ligada Real Madrid öz meýdançasynda Raýo Wallekanony Kroos we Benzemanyň gollary bilen 2-1 ýeňdi. Sanawyň lideri Real Sosiedad hem myhmançylykda Osasunadan Merino we Ýanuzaýyň (p) gollary esasynda 2-0 üstün çykdy. Andalusiýa derbisinde-de Sewilýa myhmançylykda Betisi 2-0 hasap bilen utdy.
