Türkmenistanly tälimçi Gurban Berdiýewiň tälim berýän Kaýrat topary Gazagystanyň kubogyna mynasyp boldy. Astana Arenada oýnalan finalda Kaýrat bilen Karaganda şäheriniň Şahtýor topary duşuşdy, Çekeleşikli geçen finalyň birinji ýarymynda Kaýrat braziliýaly hüjümçisi Wagner Lowuň (6, 40) gollary bilen 2-0 öňe saýlandy. Karagandalylar Gabyşew (47) hem-de Toşewiň (75) 2-nji ýarymda hasaby deňlemegi başardylar. Oýnuň esasy wagty 2-2 deňlikde tamamlandy. Goşmaça wagtda, has takygy, 97-nji minutda penaltini dürs uran Tattybaýew Şahtýory öňe saýlady. 111-nji minutda-da Şuşanaçew hasaby deňledi. Şeýlelikde, goşmaça wagty-da deňlikde tamamlanan oýnuň ýeňijisini penalti urgulary kesgitledi. Her topar 10 gezek penalti urgusyny ýerine ýetirdi. Kaýratly futbolçylar 10 urgynyň diňe birinde, şahtýorlylar ikisinde ýalňyşdylar. Netijede, 9-8 öňe saýlanan Kaýrat Gazagystanyň Kubogyna 10-njy gezek mynasyp boldy. Bu görkeziji ýurduň rekordyna deňdir. Almaty şäheriniň wekili mundan ozal, 1992-nji ýylda, 1996/97, 1999/2000 möwsümlerinde, şeýle-de, 2001-nji, 2003-nji, 2014-nji, 2015-nji, 2017-nji, 2018-nji ýyllarda Gazagystanyň Kubogyny eýeläpdi.
Gurban Berdiýewiň tälimçiliginde Kaýrat çempionaty 3-nji orunda tamamlapdy.
