Braziliýaly super ýyldyz, El Fenomeno lakamly hüjümçi Ronaldo Luis Nazario de Lima 2-nji klubuny satyn aldy. Ol özüniň futbola başlan kluby, Braziliýanyň meşhur toparlaryndan Kruzeirony satyn alandygyny mälim etdi. 45 ýaşyndaky Ronaldonyň Kruzerio üçin 70 million dollar töländigi habar berildi. Ol 2 ýyl ozal aşaky liga düşen Kruzeironyň täzeden öňki başarnykly döwürlerine dolandyrmak üçin elinden geleni gaýgyrmajakdygyny aýtdy. Braziliýada mundan birnäçe aý ozal, janköýerlere degişli bolan klublary maýadarlar satyn alyp bilenokdy. Düzgüniň azda-kände üýtgedilmeginden soň, klublary satyn almak bolýar. Ýeri gelende aýtsak, Ronaldo 2018-nji ýylda häzirki wagtda La Liga 2-nji ligada çykyş edýän Real Walýadolid klubunyň 51 göterimlik paýnamasyny satyn alypdy. Kruzeiro onuň eýeçilik edýän 2-nji kluby boldy.
1990-njy ýyllaryň ahyrynda 2000-nji ýyllaryň başynda dünýä futbolynda uly yz galdyran Ronaldo karýerasy boýunça 452 oýunda 295 gol geçiripdi. Ol PSW, Barselona, Real Madrid, Inter, Milan ýaly klublarda oýnapdy.
