Türkmenistanda jorap önümlerini öndürýän “Batly Gadam” HK we deňiz ulag kompaniýasy bolan “Türkmen deňiz hyzmatlary” HJ, halkara ISO ülňüleriniň talaplaryna laýyklykda halkara sertifikatlaşdyrmagy üstünlikli geçdiler.
Türkmenistanyň Senagatçylar we telekeçiler birleşmesiniň agzasy, Balkan welaýatynda ýerleşýän “Batly Gadam” hususy kärhanasy 2010-njy ýylda işe başlady. Kärhana 2018-nji ýylda ýokary hilli pagta ýüplükleri we jorap önümlerini öndürmek üçin täze dokma önümçiligi açyldy.
2021-nji ýylyň dekabr aýynda kompaniýanyň hil, ekologiýa we zähmeti goramak boýunça durnukly ösüş strategiýasynyň tassyklamasy hökmünde “Batly Gadam” kärhanasy toplumlaýyn hil dolandyryş ulgamy – ISO 9001:2015, daşky gurşawy dolandyrmak – ISO 14001:2015 we saglygy goramak we zähmet howpsuzlygy – ISO 45001:2018 şahadatnamalaryny aldy.
Häzirki wagtda kompaniýanyň önümlerine içerki we halkara bazarlarda uly isleg bildirilýär. Pagtadan öndürilen jorap önümleri Türkiýä, Gazagystana, Eýrana, Azerbaýjana we Russiýa Federasiýasyna eksport edilýär.
“Türkmen deňiz hyzmatlary” hojalyk jemgyýeti 2012-nji ýyldan bäri iş alyp barýar. Kompaniýa gämileri, mehaniki we elektrik enjamlaryny abatlamak bilen meşgullanýar. Deňiz gämileri üçin agentlik we dürli ugurlarda maslahat beriş hyzmatlaryny berýär.
Ýolagçylaryň we ýükleriň daşalmagyny amala aşyrýar, şeýle hem düýbüni çuňlaşdyrma işleri, enjamlary, ätiýaçlyk şaýlaryny üpjün etmek we gämileri eltip bermek bilen meşgullanýar. 2021-nji ýylyň dekabr aýynda “Türkmen deňiz hyzmatlary” HJ halkara hil dolandyryş ulgamlary ISO 9001:2015 we saglygy goramak we zähmet howpsuzlygy – ISO 45001:2018 laýyklykda sertifikat barlagyny geçdi.
Kärhanalary halkara ülňülerine laýyklykda sertifikatlaşdyrmak, önümlerini daşary ýurda eksport edende, hyzmatdaşlar we maýadarlar bilen gepleşikler geçirende, şeýle hem bäsleşiklere gatnaşanda goşmaça artykmaçlyk berer.
