Professional derejede çykyş edýän iň ýaşuly futbolçy hasaplanýan ýaponiýaly Kazuýoşi Miura ýene bir ýyllyk şertnama baglaşdy. Ýaponiýanyň 2-nji ligasynyň topary Ýokohama FK-de çykyş edýän 54 ýaşyndaky hüjümçi 4-nji liganyň toparlaryndan Suzuka Point Getters bilen bir ýyllyk kärendesine şertnama baglaşdy. Karýerasy boýunça 36 möwsümi arka atan we fewral aýynda 55-nji ýaşyna gadam basjak Miura agasy Ýasutoşi Miuranyň ýolbaşçylyk edýän Suzuka Point Getters bilen şertnama baglaşandygy üçin hoşaldygyny aýtdy. Ýaponiýadan başga-da Santos (Braziliýa), Jenoa (Italiýa), Dinamo Z (Horwatiýa) hem-de Sidneý FK (Awstraliýa) ýaly ýurtlaryň klublarynda-da oýnan Miura milli ýygyndyda 89 oýunda 55 gol geçirdi. Ol 60 ýaşyna çenli futbol oýnamagy göz öňüne tutýandygyny beren interýularynyň birinde aýdypdy.
