Ispaniýanyň Super Kubogy duşuşygynyň finalynda Real Madrid bilen Atletik Bilbao duşuşdy. Saud Arabystanynyň paýtagty Er-Riýaddaky Şa Fahdyň adyny göterýän stadionda oýnalan finalda Real Madrid geçen ýylyň ýeňijisini 2-0 hasabynda ýeňdi. Reala ýeňiş getiren gollary 38-nji minutda Luka Modriç, 52-nji minutda-da penaltiden Karim Benzema derwezä girizdi. Oýnuň 86-njy minutynda Real Madridiň braziliýaly goragçysy Eder Militao jerime meýdançasynyň içinde topy eli bilen oýnany üçin gyzyl kart aldy. Bellenen penalti urgusyny bolsa Raul Garsiýa dürs ýerine ýetirip bilmedi. Şeýlelikde, Real Madrid 12-nji gezek Ispaniýanyň Super Kubogyny eýeläp, bu ugurda Barselona (13) bir ädim golaýlaşdy. Şeýle-de, Real Madrid taryhyndaky 93-nji kubogyny gazandy.
