Ispaniýanyň Şa Kubogy ýaryşynda kubogyň häzirki eýesi Barselona 1/8 finalda ýaryşdan çykdy. Katalonlary ýaryşdan geçen möwsümiň finalçysy Atletik Bilbao çykardy. San Mames stadionynda oýnalan oýunda eýýäm 2-nji minutda Iker Munian ýer eýelerini öňe saýlady. 20-nji minutda täze transfer Ferran Torres hasaby deňledi. 86-njy minutda Inigýo Martines bilbaolylary öňe çykarsa-da 90+3-ni minutda Pedri tapawutlanyp, Barselonany ýaryşda saklamagy başardy. Ýöne goşmaça wagtda, has takygy, 105+1-nji minutda penaltini dürs uran Iker Munian ýene bir ýola toparyny öňe saýlady. Bu oýundaky soňky gol bolup, Şa Kubogyny iň köp eýelän Barselona topary kubok ýaryşyny wagtyndan juda ir bes etmeli boldy. 1/8 finalda Barselonadan öň Atletiko Madrid hem Real Sosiedaddan 2-0 utulyp, kubok ýaryşy bilen şu möwsümlik hoşlaşypdy.
