17-nji ýanwardan 4-nji marty aralygynda geçirilýän “Merkezi Aziýa — wirtual EXPO” (CAVEX II) atly ikinji onlaýn sergide türkmen kärhanalary öz işlerini tanyşdyrarlar. Bu barada Türkmenistanyň Söwda-Senagat edarasynyň web saýty habar berýär.
Wirtual sergini Ýaponiýanyň ykdysadyýet, söwda we senagat ministrliginiň ýardam bermeginde Ýaponiýanyň Russiýa we täze garaşsyz döwletler bilen söwda assosiasiýasy guraýar.
Serginiň çäklerinde ýapon kompaniýalary bilen maýa goýum webinarlary, pikir alyşmalar we dürli işewürlik çäreleri geçirilýär. Şonuň bilen birlikde Merkezi Aziýa ýurtlarynyň milli günleri hem guralýar.
Türkmenistanyň milli gününi 14-18-nji fewral aralygynda belläp geçmek meýilleşdirilip, ol günlerde “Ýaponiýa bilen Türkmenistanyň arasynda söwda we maýa goýum gatnaşyklaryny mundan beýläk-de ösdürmegiň mümkinçilikleri” atly onlaýn maslahat, “CAVEX II sergisine gatnaşýan türkmen kärhanalarynyň Ýaponiýa üçin tanyşdyrylyşy” atly webinar, şol sanda Türkmenistanyň üç kärhanasyna wirtual gezelenç çäresi geçiriler.
Umuman, sergide Türkmenistandan 5 sany döwlet edarasy hem-de 15 sany hususy kärhana çykyş edýär. Gatnaşyjy kärhanalar öz işleri baradaky maglumatlaryny CAVEX-e gatnaşýanlaryň ählisi üçin elýeterli bolan milli sanly stendde ýerleşdirdiler.
