Basketbol oýnunyň iň uly şüweleňi bolan NBA All Star-da esasy düzümde çykyş etjek oýunçylar mälim edildi. Şoňa görä Günbatar konferensiýasynda toparyň kapitany LeBron Jeýms (Los Anjeles Leýkers) bolup, oňa esasy düzümde Nikola Jokiç (Denwer Naggets), Andrýuw Wiggins (Golden Steýt Warriors), Stefen Körri (Golden Steýt Warriors) hem-de Ja Morant (Memfis Grizzlis) dagy ýoldaşlyk eder. Kewin Durantyň (Bruklin Nets) kapitanlyk etjek Gündogar konferensiýasynda-da esasy düzümde Ýannis Antetokunmpo (Milwaki Baks), Joel Embid (Filadelfiýa 76ers), DeMar Derozan (Çikago Bulls) hem-de Trae Ýang (Atlanta Hawks) dagy oýnarlar. Wiggins bilen Morant ilkinji gezek All Starda çykyş etse, LeBron Jeýms 18-nji gezek All Star-a saýlandy. Ol bu ugurda merhum Kobe Braýant bilen deňleşip, Karim Abdul Jabbaryň (19) rekordyna golaýlady. NBA All Star 2022 şüweleňi 20-nji fewraldan 21-ine geçilýän gije Kliwlenddäki “Rocket Mortgage FieldHouse” arenada oýnalar.
