Italiýanyň çempionaty Serie A-da geçen tapgyryň merkezi oýnunda Milan şäheriniň derbisinde Milan myhmançylykda sanawyň lideri Interi 2-1 hasabynda ýeňdi. 38-nji minutda Iwan Perişiçiň goly bilen öňe saýlanan Inter topary Milanyň fransiýaly weteran hüjümçisi Oliwie Žirunyň 3 minutda, has takygy, 75-nji we 78-nji minutlarda geçiren gollaryna alaç tapyp bilmedi. Milan bu duşuşykda Interiň 14 oýunda bäri dowam edýän ýeňilmezeklik seriýasyny soňlandyrdy. Milan topary şu möwsümde tomusda hataryna goşan fransuz hüjümçisi Oliwie Žirunyň esasy düzümde başlan hiç bir duşuşygynda ýeňilmän, ählisinde-de ýeňiş gazandy. Žiru 8 oýunda esasy düzümde meýdança çykyp, ol şol duşuşyklarda 7 gol geçirdi.
“Milan” Ibrahimowiçsiz has köp ýeňiş gazandy
Şeýle-de toparyň esasy hüjümçisi Zlatan Ibrahimowiçiň esasy düzümde başlan 11 duşuşygynyň 4-sinde ýeňiş gazanyp, 4-sinde utuldy. 3-sinde hem deňme-deň oýnady. Milanyň Ibrahimowiçiň esasy düzümde meýdança çykmadyk 13 duşuşygynyň 12-sinde ýeňiş gazanyp, diňe birinde deňme-deň netije görkezdi.
