Ispaniýanyň çempionaty La Ligada Barselona myhmançylykda şäheriň beýleki kluby Espanýol bilen duşuşdy. Çekeleşikli geçen Barselona derbisinde katalonlar 90+6-njy minutda ýeňlişden halas boldy. 2-nji minutda Pedri Barselonany öňe saýlasa-da 40-nji minutda Darder hasaby deňledi. 64-nji minutda Raul de Tomas ýer eýelerini öňe çykardy. Katalonlar 90+6-njy minutda Luuk de Ýonguň goly bilen hasaby deňläp, ýeňlişden halas boldy. Oýnuň ahyrynda dartgynlylyk artyp, ýer eýelerinden Niko Melamed, Barselonadan hem Žerar Pike gyzyl kart aldy.
Sanawyň lideri Real Madrid myhmançylykda Wilýarreal bilen golsuz deňme-deň oýnap, 2 utuk ýitirdi. Elçeni 2-0 ýeňen Sewilýa öňdebaryjy Real bilen aratapawudy 4 utuga düşürdi. Betis bolsa Nabil Fekiriň 2 gol geçiren oýnunda myhmançylykda Lewanteden 4-2 üstün çykdy. Birinji ýarymy 3-3 deňlikde tamamlanan duşuşykda Atletiko Madrid öz meýdançasynda Hetafeni 4-3 hasabynda ýeňdi.
