FIFA Klublar arasy Dünýä Kubogy ýaryşynda Angliýanyň Çelsi kluby çempion boldy. UEFA Çempionlar Ligasynyň ýeňijisi hökmünde bu ýaryşa gatnaşan Çelsi BAE-de geçirilen bäsleşigiň finalynda Braziliýanyň Palmeiras topary bilen duşuşdy. Çekeleşikli geçen oýunda Çelsi goşmaça wagtda Libertadores Kubogynyň çempiony 2-1 hasabynda ýeňdi. Çelsiniň gollaryny 54-nji minutda Romelu Lukaku hem-de 117-nji minutda penaltiden Kai Hawerts geçirdi. Brazilleriň ýeke-täk pökgüsini-de 64-nji minutda penaltiden Rafael Weiga öz adyna ýazdyrdy. Şeýlelikde, 2012-nji ýyldaky finalda başga bir brazil kluby Korintiansdan utulan Çelsi bu gezek kubogy eýelemegi başardy. Bu ýeňişden soň Çelsi halkara arenadaky ähli kubogy eýelän 5-nji topar boldy. Çelsi UEFA Çempionlar Ligasy, Ýewropa Ligasy, ozal geçirilen Kubokçylaryň Kubogy ýaryşy, UEFA Super Kubogy bäsleşikleriniň hataryna FIFA Klublar arasy Dünýä Kubogynyň (ozalky ady we görnüşi Interkontinental Kubogy) çempionlygyny hem goşmagy başardy. Çelsiden ozal Aýaks, Ýuwentus, Mançester Ýunaýted hem-de Bawariýa muny başarypdy.
Ýaryşda Al Hilaly 4-0 ýeňen Al Ahli 3-nji ýeri eýeledi. Çelsiniň braziliýaly goragçysy Tiagol Silwa bäsleşigiň Altyn top baýragyna laýyk görüldi. Palmeirasyň oýunçylary Dudu bilen Danilo degişlilikde, Kümüş we Bürünç top baýraklary bilen sylaglandy.
