Italiýanyň çempionaty Serie A-da sanawyň öňdebaryjylary bu tapgyrda ýitgä sezewar boldular. Sanawyň lideri Milanyň myhmançylykda iň aşaky orunda barýan Salernitina bilen 2-2 deňme-deň oýnamagyndan soň Inter bu pursatdan peýdalanyp bilmedi. Soňky çempion öz meýdançasynda Sassuolodan 2-0 asgyn geldi. Gollary 8-nji minutda Raspadori bilen 26-njy minutda Skamakka geçirdi. Şeýlelikde, Inter birinji orna geçmek mümkinçiliginden ýerlikli peýdalanyp bilmedi.
11-nji orunda barýan Sassuolo topary şu möwsümde çempionatyň güýçli klublaryny myhmançylykda ýeňmegi başardy. Topar oktýabr aýynda Ýuwentusy 2-1, noýabrda-da Milany 3-1 fewralda-da Interi 2-0 ýeňip, köpleriň ünsüni çekdi.
Bu tapgyrda Ýuwentus Turin şäheriniň derbisinde Torino bilen 1-1 deňme-deň oýnady. Atalanta bolsa myhmançylykda Fiorentinadan 1-0 asgyn geldi. Paýtagtyň wekilleri hem 26 tapgyrda ýeňiş gazanyp bilmediler. Roma öz meýdançasynda Werona bilen 2-2, Lasio myhmançylykda Udineze bilen 1-1 deňme-deň oýnady. 3-nji basgçançakdaky Napoli şu gün myhmançylykda Kaliari bilen duşuşar.
