Ispaniýanyň çempionatynda Barselonanyň şemaly belentden öwüsýär. Hawiniň tälimçilige bellenmeginden soň kem-kemden özüni dürsäp başlan katalonlar gyşky transferleriniň-de şowuna bolmagy bilen garşydaşlaryny uly hasaplar bilen ýeňmegi başarýar. La Liganyň 26-njy tapgyrynda Barselona öz meýdançasynda özüne hemişe kynçylyk döredýän Atletik Bilbao bilen duşuşdy. Turuwbaşdan oýnuň jylawyny özünde saklan katalonlar 4-0 hasabynda ýeňşini baýram etdi. Barselona ýeňiş getiren gollary Obameýang (37), Dembele (73), Luuk de Ýong (90) hem-de Depaý (90+3) geçirdi. Şeýlelikde, Barselona soňky 6 duşuşygynyň 4-sinde 4 golly ýeňiş gazanmagy başardy. Şol bir wagtyň özünde Barselona Hawini tälimçiligindäki 20 duşuşykda 10-njy ýeňşini gazandy (6 deňlik, 4 ýeňliş).
La Ligada sanawyň lideri Real Madrid myhmançylykda Raýo Wallekanony Karim Benzemanyň ýeke-täk goly bilen 1-0 ýeňipdi. Sewilýa şäheriniň derbisinde 2-nji ýerdäki Sewilýa 3-nji orundaky Betisi 2-1 hasabynda utdy. Soňky çempion Atletiko Madrid hem Seltany Renan Lodiniň gollary bilen 2-0 ýeňdi.
