NBA-da Denwer Naggets öz meýdançasynda Memfis Grizzlisi 122:109 hasabynda ýeňdi. Duşuşykda ýeňiş gazanan toparyň serbiýaly ýyldyzy Nikola Ýokiç 35 utuk, 16 ribaundlyk netijeler bilen double-double etmegi başardy. Bu ýeňişden soň topar Günbatar konferensiýasynda pleý-off oýnamaga hukuk gazanan soňky klub boldy. Duşuşygyň iň esasy wakasy bolsa, double-double netijeden soň Ýokiç NBA-nyň taryhyna adyny altyn harplar bilen ýazdyrdy. Ol NBA-nyň taryhynda bir möwsümde 2000 utuk, 1000 ribaund hem-de 500 asist görkezijilerden geçen ilkinji basketbolçy boldy. Adaty möwsümiň iň gymmatly oýunçysy (MVP) baýragyny bu ýyl hem almagyna garaşylýan Ýokiç eger-de, ol ýene MVP saýlansa, Ýannis Antetokunmpodan soň bu hormata yzly-yzyna laýyk görlen ikinji daşary ýurtly basketbolçy bolar.
