Katar 2022-de dowam edýän 22-nji Dünýä Kubogy ahyrlap barýar. Çempionatda şu gün we ertir çärýek finalyň oýunlary oýnalar we ýarym finalda çykyş etjek 4 ýygyndy belli bolar. Häzirki wagtda 3 yklymyň wekliniň ýaryşy dowam edýändigini belläp, günüň ilkinji duşuşygynda Horwatiýa bilen Braziliýa duşuşar. Aşgabat wagty bilen 20:00-da başlanjak oýun Al Raýýandaky “Education City” stadionynda oýnalar we duşuşyga angliýaly Maýkl Oliwer eminlik eder. Bu duşuşyk 2 ýygyndynyň arasyndaky 6-njy oýun bolar. Horwatiýanyň ýygyndysyna mundan öňki 5 duşuşykda ýeňiş gazanmak başartmady. Braziliýa şol oýunlarda 3 gezek garşydaşyndan üstün çykdy. Şol 5 duşuşygyň 2-si Dünýä Kubogynyň çäginde bolup, Braziliýa 2006-njy ýylda Horwatiýany Kakanyň ýeke-täk goly bilen 1-0 ýeňipdi. Olaryň Dünýä Kubogynda 2-nji özara duşuşygy 2014-nji ýylda bolup, Braziliýada geçen ýaryşda ýer eýeleri açylyş duşuşygynda 3-1 hasabynda ýeňiş gazanypdy. Duşuşykda Neýmar 2 gol geçiripdi. Duşuşykda Neýmar ýene-de tapawutlansa, onda ol Peläniň rekordyna şärik bolar.
