Angliýanyň “Premier Ligasynda” 22-nji tapgyryň duşuşyklary geçirilip, çempionlyk ugrunda öňde barýan iki klub hem ýeňlişe sezewar boldy. Sanawyň lideri “Arsenal” myhmançylykda Frank Lampardyň ornuna Şon Deýç tälimçilige bellän “Ewertondan” 1-0 asgyn gelip (Tarkowski 60), çempionatda 13 oýundan soň utuldy. Bu topçularyň şu möwsümdäki 2-nji ýeňlişi boldy. “Arsenaldan” 5 utuk yzda barýan soňky çempion “Mançester Siti” bu pursatdan ýerlikli peýdalanyp bilmedi. Guardiolanyň şägirtleri Londonda “Arsenalyň” köne bäsdeşi “Tottenham bilen duşuşdy. Çekeleşikli geçen oýunda “Tottenham” 1-0 hasabynda ýeňiş gazanmagy başardy. “Tottenhamyň” ýeke-täk goluny 15-nji minutda Harri Keýn geçirdi. Bu onuň “Premier Ligadaky” 200-nji goly hökmünde hasaba alyndy. Ýyldyz hüjümçi Alan Şirer (260) hem-de Weýn Runiden (208) soň bu ugurda 3-nji ýerde barýar. Şeýle-de, Keýn “Tottenhamyň” adyndan 267-nji goluny geçirip, klubuň iň köp gol geçiren futbolçysy rekordyny Jimmi Griwezden almagy başardy. “Mançester Siti” topary “Tottenhamyň” täze stadionda oýnan 5-nji duşuşygynda gol geçirmezden ýeňlişe sezewar boldy.
“Premier Ligada” “Mançester Ýunaýtediň” “Kristal Palasy” 2-1 ýeňen tapgyrynda “Liwerpul” myhmançylykda “Wulwerhemptondan” 3-0 asgyn geldi. Transferlere millionlarça maýa goýberen “Çelsi” toparyna öz meýdançasynda “Fulhamy” ýeňmek başartmady.
