Angliýanyň “Premier Ligasynda” tälimçisi Grem Potteri wezipesinden ugradan “Çelsi” topary täze tälimçisini tapdy. Londonlylar wagtlaýynça, has takygy, möwsümiň ahyryna çenli ozalky oýunçysy hem-de tälimçisi Frank Lampard bilen ylalaşyk gazandylar. 44 ýaşyndaky hünärmen möwsümiň galan 11 duşuşygynda topara tälim berer. Bu barada klub tarapyndan resmi habar berildi. Futbolçylyk karýerasynyň agramly bölegini “Çelside” geçiren Lampard 2019-njy ýylda topara tälimçi bolup dolanypdy. “Çelside” 1,5 ýyldan gowrak wagt tälimçi bolup işlän Lampardyň 1-nji möwsümi şowly geçdi. Topar çempionaty onuň tälimçiliginde 4-nji orunda tamamlapdy. 2-nji möwsümine şowly başlasa-da, 1-nji aýlawyň öňüsyrasynda alnan şowsuz netijelerden soň ol 2021-nji ýylyň 25-nji ýanwarynda wezipesinden boşadylypdy. Ol “Çelside” 84 duşuşykda 44 oýunda ýeňiş gazanyp, 23 oýunda utuldy. 17 oýunda-da deňme-deň netije görkezip, topary FA Kubogynda finala çykarypdy. Lampard “Çelsiden” soň “Ewertondaky” tälimçilik günleri bolsa o diýen öwerlikli bolmady. Ol golaýda ýagny, şu ýylyň 23-nji ýanwarynda “Ewertondaky” wezipesinden boşadylypdy.
Lampardyň klubda galyp-galmajakdygyny, ýagny şertnamasynyň uzaldylyp-uzaldylmajakdygyny bolsa galan 11 duşuşyk hem-de Çempionlar Ligasyndaky ýagdaýy görkezer.
Lampardyň “Çelsidäki” 2-nji tälimçilik tejribesiniň ilkinji synagy “Wulwerhempton” duşuşygy bolar. “Çelsi” geljek hepdäniň dowamynda-da Çempionlar Ligasynda çärýek finalda “Real Madrid” bilen myhmançylykda duşuşar.
