Geçen hepdäniň çarşenbe güni 1-0 ýeňiş gazanan “Milan” myhmançylykda “Napoliden” ýeňilmedi (1-1). Çekeleşikli we dartgynly geçen duşuşyga ýer eýeleri erjel başlasa-da olara hasaby açmak başartmady. Garşylyklaýyn hüjümler bilen oýnan “Milanyň” weteran hüjümçisi Oliwie Žiru 23-nji minutda hasaby açmaga golaý geldi. Onuň ýerine ýetiren penalti urgusyny Aleks Meret saklamagy başardy. Ýöne bu pursatdan 20 minut soň, has takygy, 43-nji minutda Rafael Leaonyň ajaýyp pasyndan soň Žiru topary derwezä girizip, penalti salyp bilmedik ýalňyşynyň öwezini doldy. 2-nji ýaryma-da hüjümler bilen başlan “Napoli” toparynyň gruziýaly ýyldyzy Hwiça Kwarasheliýa üçin hasaby deňlemäge uly mümkinçilik boldy. Onuň 82-nji minutda uran penaltisini derwezeçi Maýk Menýan sowmagy başardy. 90+3-nji minutda nigeriýaly hüjümçi Wiktor Osimheniň geçiren goly “Napoli” toparyna ýarym final üçin ýeterlik bolmady. “Milan” aprel aýynda “Napoli” bilen 3-nji gezek duşuşyp, 2 sapar ýeňiş gazandy, 1 oýun hem deňlikde tamamlandy (Gollarda 6-1 öňde. Çempionlar Ligasynda 5 oýundan soň gol geçirden “Milan” umumy hasapda 2-1 öňe saýlanyp, ýarym finala çykdy. 16 ýyldan soň ýarym finala adyny ýazdyran “Milan” soňky gezek 2007-nji ýylda ýarym finalda oýnap, soňlugy bilenem şol möwsüm çempion bolupdy. “Milan” topary Çempionlar Ligasynda 7-nji, umumylykda-da bu ýaryşda 13-nji gezek ýarym finala çykdy. Italýan kluby “Real Madrid” (32), “Bawariýa” hem-de “Barselonadan” soň iň köp ýarym finala çykan 4-nji topardyr. “Milanyň” ýarym finaldaky garşydaşy “Inter” ýa-da “Benfika” bolar.
