Ýaponiýanyň ýaşaýjysy Kane Tanaka 2022-nji ýylyň 19-njy aprelinde aradan çykdy, ol 119 ýyl 107 gün ömür sürdi. Onuň uzak ömürliliginiň syry barada ýurtda uzak ýaşlylary hasaba alýan guramanyň Prezidenti Ýumi Ýamamoto gürrüň berdi. Onuň aýtmagyna görä, Tanaki hanyma elmydama aramlyk mahsus bolupdyr. Aslynda bu häsiýet ýaponlaryň köpüsine mahsusdyr. Tanaki gazly suwy halapdyr, emma ony saglygyna zeper ýetirmezlik üçin çeni bilen içipdir. “Ýaponlar kadaly iýmitlenýärler, olar gereginden artyk iýip-içmeýärler” diýip, Ýamamoto gürrüň berýär. Ýaponiýaly uzak ýaşlylar “hara hati bu” diýilýän iýmitleniş usulyndan peýdalanýarlar, ol doly däl-de, 75-80% doýmagy aňladýar. Hünärmeniň sözlerine görä, ýaponlar köp hereket edýärler. Kane Tanaka 1903-nji ýylyň 2-nji ýanwarynda dünýä inýär, ol bütin ömrüne tüwi külçeleri bişirip satypdyr. Ömrüniň soňky 17 ýylyny garrylar öýünde geçiripdir. Ol ýerde wagty stolda oýnalýan oýunlara güýmenipdir, kalligrafiýa bilen gyzyklanypdyr, tapmaçalary çözüpdir. Ol ölmezinden iki ýyl ozal, 2020-nji ýylda Ýaponiýanyň taryhynda iň uzak ýaşly adamy diýlip yglan edilipdir. Şeýle hem ol ýaşan döwründe iň köp ýaşan adam hökmünde Ginnesiň rekordlar kitaby tarapyndan hasaba alnypdy. Dünýäde iň köp ýaşan adam fransiýaly zenan Žanna Kalmandyr. Ol 1875-nji ýylyň 21-nji fewralynda dünýä inýär, 1997-nji ýylyň 4-nji awgustynda aradan çykýar. Ol 122 ýyl 164 gün ýaşaýar.
Mährem BABAMYRADOWA, Hojambaz etrabynyň ýaşaýjysy.
