PDF
Öýüň rahatlygy we gelşikliligi arassaçylykdan başlanýar. Irki ýyllarda öýi arassalamakda dürli usullar ulanylan bolsa, häzirki döwürde täze tehnologik enjamlar peýda bolýar. Şolaryň biri hem «akylly» tozan sorujy enjamdyr.
Smartfona ýa-da planşete kabelsiz baglanýan bu enjamy oturan ýeriňde dolandyryp bolýar. Tozan soruja gözegçilik edip, haýsy otagyň arassalanandygyny we nireden näçeräk hapanyň toplanandygyny görüp bolýar. Smartfonda öýüň kartasyny çyzyp, bu enjama buýruk bermek arkaly dolandyryp bolýar. «Akylly» tozan sorujy awtomatik gurak we çygly arassalamak üçin sensorlar, lazer nawigasiýasy (LiDAR) we programma dolandyryşy bolan enjamdyr. Häzirki wagtda meşhurlygy artýan bu enjamy «Dreame», «Roborock», «Xiaomi» we «Narwal» ýaly brendler işläp taýýarlaýar.
«Akylly» tozan sorujylar sesiniň pesligi, ulanmagyň aňsatlygy we awtonom işlemegi bilen arassaçylyk işlerini ep-esli ýeňilleşdirýär. Tozan sorujynyň täze nesli kiçijik bolandygy üçin belli bir çägi uzak wagtlap arassalamaly bolýar. «Akylly» tozan sorujylar adatça tegelek we pessejik bolýar. Bu bolsa enjamyň şkafyň we çekmäniň aşagyny arassalamaga, şeýle hem insiz ýerden hem dykylman geçmegine mümkinçilik berýär. «Akylly» tozan sorujy baradaky ilkinji synanyşyklar 1950-nji ýyllarda başlanýar. 1990-njy ýylda öý hojalyk robotlaryny öndürmäge niýetlenen «iRobot» kompaniýasy esaslandyrylýar. Bu kompaniýa 2002-nji ýylda «Roomba» atly «akylly» tozan sorujyny işläp düzýär. 2005-nji ýylda bolsa poly arassalamak üçin «Scooba» hödürlenýär. Mundan başga-da, «Electrolux», «Dyson» we «Neato Robotics» kompaniýalary hem tegelek tozan sorujynyň (Electrolux Trilobite, DC06, XV-11) birnäçe nusgasyny öndürýär. «Electrolux» kompaniýasynyň «akylly» tozan sorujynyň käbir görnüşi bir gezekde 150 inedördül metr meýdany süpürip bilýär. Robot tozan sorujy belli bir algoritm boýunça otaglary aýlanýar, burçlary, diwarlary we basgançaklary aňsatlyk bilen tanap bilýär. Arassalaýyş işleri tamamlanandan soň, zarýad berilýän ýerine gaýdyp gelýär.
