PDF
Hemmäniň sabyrsyzlyk bilen garaşýan tutluşyklarynyň wagty gelip ýetdi. Ertir, ýagny 19-njy ýanwarda irden ABŞ-nyň Kaliforniýa ştatynyň Inglwud şäherindäki “Intuit Dome Arenada” UFC 311 ady bilen nobatdaky MMA duşuşyklary geçiriler.
Saruhýan şikesi sebäpli tutluşmaz
Ýeňil agramda russiýaly Islam Mahaçew bilen ermenistanly Arman Saruhýan tutluşmalydy. Ýöne soňky pursatda şikes alan Saruhýanyň tutluşyga gatnaşyp bilmejekdigi habar berildi. Netijede, Mahaçew çempionlyk duşuşygyny Saruhýan däl-de, braziliýaly Renato Moýkano bilen geçirer. 35 ýaşyndaky Moýkano 2014-nji ýyldan bäri UFC-niň düzüminde çykyş edip gelýär. 35 ýaşyndaky türgeniň 26 duşuşykda 20 ýeňşi bolup, 5 gezegem garşydaşlaryndan asgyn geldi.
2019-njy ýylda Saruhýany ýeňmegi başaran 33 ýaşyndaky Mahaçew şu wagta çenli geçiren 27 duşuşygynyň 26-synda ýeňiş gazanyp, ol diňe 2015-nji ýylda UFC-niň çägindäki 2-nji duşuşygynda braziliýaly Adriano Martinsden ýeňlipdi.
Çempionlyk duşuşygy
Agşamyň başga bir esasy duşuşygy-da orta ýeňil agramdaky çempionlyk duşuşygy bolar. Gruziýaly Merab Dwalişwili bilen russiýaly Umar Nurmagomedow çempionlyk üçin oktagona çykarlar.
34 ýaşyndaky Dwalişwili karýerasy boýunça 22 duşuşygyň 18-sinde ýeňiş gazanyp, 4-sinde garşydaşlaryndan asgyn geldi.
29 ýaşyndaky Nurmagomedow bolsa 18 duşuşygynyň ählisinde-de ýeňiş gazanyp, karýerasyny doganoglany Habib Nurmagomedow ýaly ýeňlişsiz dowam edýär.
UFC 311 ady bilen geçiriljek tutluşyklaryň çäginde başga-da birnäçe duşuşyklar guralar. UFC 311 19-njy ýanwarda, ýagny ýekşenbe güni irden 07:00-da başlanar we Match TV, Varzish TV ýaly ýaýlymlar arkaly görkeziler.
