Türkmenistanyň Mejlisiniň wekilleri 14-nji awgustda Özbegistan Respublikasynyň Daşkent şäherinde geçirilen «Garaşsyz Özbegistan: 35 ýyllyk ösüş ýoly, özgertmeler, gazanylan netijeler we geljekki mümkinçilikler» atly halkara ylmy-amaly maslahata gatnaşdylar.

Halkara maslahatyň maksatnamasy giň gerimli bolup, ol umumy mejlisden we dürli ugurlar boýunça mowzuklaýyn bölümlerden ybarat boldy. Halkara maslahatyň dowamynda dünýäniň öňdebaryjy bilermenleriniň, alymlarynyň we parlament wekilleriniň gatnaşmagynda döwrebap ösüşiň wajyp meseleleri ara alnyp maslahatlaşyldy.

Maslahatyň mowzuklaýyn bölümlerinde döwletliligi we ykdysady durnuklylygy berkitmegiň möhüm ugurlaryna seredildi. Hususan-da «Häzirki zaman parlamenti: ykdysady transformasiýa, maýa goýumlary çekmek we inklýuziw ykdysady ösüş»,  «Adam maýasy we durmuş syýasaty: inklýuziw ösüşiň ileri tutulýan ugurlary we parlament tejribesi», «Ekologiýa durnuklylygy we «ýaşyl» ykdysadyýet: suw howpsuzlygy, howanyň üýtgemegine uýgunlaşmak we Aralboýy sebitiniň transformasiýasy» atly temalarda häzirki zaman şertlerinde kanun çykaryjy edaralaryň ykdysady ösüşi we maýa goýum gurşawyny gowulandyrmakdaky orny, sebitde ekologik ýagdaýy durnukly saklamak, «ýaşyl» tehnologiýalary ornaşdyrmak we suw serişdelerini rejeli peýdalanmak ýaly wajyp ugurlar boýunça çykyşlar diňlenildi.

Halkara ylmy-amaly maslahatyň ahyrynda «Özgertmeleriň ileri tutulýan  ugurlary: strategik netijeler, amaly maslahatlar we geljegi uly wezipeler» atly jemleýji umumy mejlisde bölümçelerde ara alnyp maslahatlaşylan ugurlar boýunça çykyşlar diňlenildi we onda sebit we halkara hyzmatdaşlygy has-da berkitmäge gönükdirilen täze teklipler ara alnyp maslahatlaşyldy.

Türkmenistanyň Mejlisiniň wekilleri öz çykyşlarynda ýurdumyzyň raýatlarynyň ýaşaýyş-durmuş derejesini ýokarlandyrmak, olaryň zähmet, dynç alyş şertlerini has-da gowulandyrmak, ýokary hilli bilim almaklary, saglygynyň goralmagy üçin döwlet tarapyndan giň mümkinçilikleriň döredilýändigini bellediler.  Şeýle hem halkara derejesinde geçirilýän maslahatlaryň halklaryň arasyndaky dostluk köprüleriniň, özara ynanyşmagyň berkidilmeginde, durnukly maýa goýum we ynsanperwer hyzmatdaşlygyň ösdürilmeginde institusional hyzmatdaşlyk mehanizmleriniň giňeldilmeginde,  bu ugurdaky milli kanunçylykda öňdebaryjy tejribeleri paýlaşmakda açyk meýdança bolup durýandygyny nygtadylar.

Çeşme: mejlis.gov.tm

Gyzykly bolup bilerЕЩЕ ОТ АВТОРА