Golaýda Mary şäherindäki «Türkmeniň ak öýi» binasynyň öňündäki meýdançada «Ýaňlan, Diýarym! — 2026» telebäsleşiginiň Mary welaýat tapgyry geçirildi.

Mukaddes Garaşsyzlygymyzyň şanly 35 ýyllygy mynasybetli edebiýat we sungat işgärleriniň, höwesjeň aýdymçy ýaşlaryň arasynda yglan edilen Türkmenistanyň Prezidentiniň «Türkmeniň Altyn asyry» atly döredijilik bäsleşiginiň çäklerinde geçirilýän bäsleşige etrap, şäher tapgyrlarynda ýeňiş gazanyp, öňe saýlanan ýaş höwesjeň aýdymçylaryň 10-sy gatnaşdy. Ýaş zehinleriň bäsleşigiň dowamynda sahnada özlerini alyp baryşlaryna, egin-eşiklerine, aýdymlaryň sözlerini dogry ýerine ýetirişlerine eminler topary tarapyndan mynasyp baha berildi.

Bäsleşikde ýaş zehinleriň 5-si deň netije gazanyp (her biri 70 utuk toplady), bäsdeşlerinden öňe saýlanmagy başardy. Eminler toparynyň gelen netijelerine görä, aýdymçylaryň ikisi — Mary şäheriniň «Margiana» medeniýet köşgüniň höwesjeň aýdymçysy Uzukjemal Pälwanowa hem-de Marynyň Beýik Saparmyrat Türkmenbaşy adyndaky medeniýet köşgüniň höwesjeň aýdymçysy Mähri Akmyradowa ýeňiji diýlip yglan edildi. Şeýlelikde, olar «Ýaňlan, Diýarym! — 2026» telebäsleşiginiň döwlet derejesinde geçiriljek tapgyryna gatnaşmaga hukuk gazandylar. Bäsleşige gatnaşan ýaş zehinleriň ählisine hormatly Prezidentimiziň adyndan dabaraly ýagdaýda sowgat gowşuryldy.

Çeşme: “Türkmenistan” gazeti

Gyzykly bolup bilerЕЩЕ ОТ АВТОРА