PDF
1-nji iýulda Türkmenistanyň daşary syýasat edarasynyň binasynda Türkmenistanyň we Gazagystan Respublikasynyň Daşary işler ministrleriniň derejesinde syýasy geňeşmeler geçirildi. Diplomatlar hoşniýetli goňşuçylyk we özara hormat goýmak ýörelgelerine esaslanýan döwletara hyzmatdaşlygyň esasy ugurlaryna syn berdiler.
Syýasy-diplomatik ugur boýunça taraplar iki döwletiň Baştutanlary tarapyndan kesgitlenýän ikitaraplaýyn gatnaşyklaryň ýokary depginini bellediler. Jemgyýetçilik diplomatiýasynyň möhüm guraly hökmünde parlamentara gatnaşyklary işjeňleşdirmäge aýratyn üns berildi. Ministrler garaýyşlary dessin utgaşdyrmaga mümkinçilik berýän yzygiderli daşary syýasat edaralarynyň arasyndaky geňeşmeler mehanizmine ýokary baha berdiler.
Ählumumy gün tertibiniň meseleleri ara alnyp maslahatlaşylanda, köptaraplaýyn başlangyçlara özara goldaw bermek arkaly BMG-niň we beýleki abraýly halkara guramalarynyň çäklerinde ýakyn hyzmatdaşlyga ygrarlylyk tassyklanyldy.
Söwda-ykdysady hyzmatdaşlyga ünsi jemläp, taraplar özara söwda dolanyşygynyň möçberlerini artdyrmak we haryt dolanyşygynyň gurluşyny diwersifikasiýalaşdyrmak boýunça ädimleri kesgitlediler. Sebitiň üstaşyr mümkinçiliklerinden has netijeli peýdalanmaga gönükdirilen energetika pudagy we ulag-üstaşyr hyzmatdaşlygy ileri tutulýan ugurlaryň hatarynda görkezildi. Şeýle hem ministrler iki ýurduň sebitleriniň arasynda göni gatnaşyklary pugtalandyrmaga ýardam edýän serhetýaka hyzmatdaşlygyny ösdürmegi goldadylar.
Medeni-ynsanperwer gatnaşyklary ösdürmek meselesi medeniýet, ylym we bilim ugurlarynda däp bolan aragatnaşyklary has-da çuňlaşdyrmak nukdaýnazaryndan ara alnyp maslahatlaşyldy. Söhbetdeşler maglumat ulgamyndaky hyzmatdaşlygy giňeltmegiň möhümdigini nygtadylar. Şeýle hem saglygy goraýyş we sport ugurlarynda hyzmatdaşlygyň mümkinçilikleri aýratyn bellenildi.
Gepleşikleriň möhüm temalarynyň biri suw serişdeleri babatynda we howanyň üýtgemegi bilen bagly meselelerde hyzmatdaşlyk boldy. Taraplar Araly halas etmegiň halkara gaznasynyň (AHHG) çäklerindäki özara gatnaşyklary jikme-jik ara alyp maslahatlaşdylar we Hazar meselesi boýunça garaýyşlaryny deňeşdirdiler. Gazak tarapy Türkmenistanyň Merkezi Aziýada howanyň üýtgemegi bilen bagly tehnologiýalar boýunça Sebit merkezini döretmek baradaky başlangyjyny goldaýandygyny beýan etdi.
Duşuşygyň ahyrynda Daşary işler ministrlikleriniň ýolbaşçylary sebit hyzmatdaşlygynyň görnüşleriniň çäklerinde köptaraplaýyn hyzmatdaşlygy mundan beýläk-de pugtalandyrmaga gönükdirilendiklerini tassykladylar.
***
Şol gün Türkmenistanyň Daşary işler ministrligi bilen Gazagystan Respublikasynyň Daşary işler ministrliginiň arasynda 2027–2028-nji ýyllar üçin Hyzmatdaşlyk maksatnamasyna gol çekmek dabarasy geçirildi. Bu resminama ministrlikleriň arasyndaky hyzmatdaşlygy ulgamlaşdyrmaga we hyzmatdaşlygyň esasy ugurlaryny berkitmäge gönükdirilendir.
Şeýle hem Gazagystan Respublikasynyň Daşary işler ministrine Türkmenistanyň Prezidenti tarapyndan gol çekilen Merkezi Aziýany XXI asyrda ösdürmek maksady bilen, dostluk, hoşniýetli goňşuçylyk we hyzmatdaşlyk etmek hakynda Gazagystan Respublikasynyň, Gyrgyz Respublikasyny, Täjigistan Respublikasynyň, Türkmenistanyň we Özbegistan Respublikasynyň arasyndaky Şertnama gowşuryldy.
