UEFA Çempionlar Ligasynyň 2-nji saýlama tapgyry tamamlandy

UEFA Çempionlar Ligasynda täze möwsümiň saýlama oýunlary ýokary depginde dowam edýär. Ýaryşyň 35-nji möwsüminiň 2-nji saýlama tapgyrynyň duşuşyklary tamamlanyp, 3-nji saýlama tapgyryna çykan toparlar belli boldy.

2-nji saýlama tapgyrda Serbiýanyň çempiony “Srwena Zwezda” topary Demirgazyk Irlandiýanyň “Larn” toparyny 2 ýerde-de uly hasaplar bilen ýeňdi. Myhmançylykda 4-0 hasabynda ýeňen serbler öz meýdançasynda garşydaşlarynyň derwezesinden jogapsyz 5 pökgi girizdiler. Oýunda Arnautowiç 2 gezek tapawutlandy. Azerbaýjanyň taryhynda ilkinji çempionlygyny gazanan “Sabah” topary Finlýandiýanyň “KuPS” toparyny myhmançylykda hem ýeňmegi başardy. Öz meýdançasynda Simiçiň ýeke-täk goly bilen ýeňen azerbaýjanlylar myhmançylykda 2-0 hasabynda utdy. Gazagystanyň “Kairat” topary Kipriň “Omoniýa” toparyny Almatyda Edilsonyň ýeke-täk goly bilen ýeňdi. 1-nji oýunda şol hasap bilen asgyn gelen gazak topary 11 metrlik urgularyň netijesinde üstün çykyp, ýaryşy dowam etdirmäge hukuk gazandy.

Duşuşykda kiprlilerden 2 futbolçy gyzyl kart aldy. Tapgyryň iň ýatda galyjy netijesi Daniýanyň çempiony AGF bilen Polşanyň çempiony “Leh Poznanyň” arasynda hasaba alyndy. Polýaklar 1-nji oýunda myhmançylykda 4-1 hasabynda ýeňiş gazanypdy. Ýöne jogap oýnunda daniýalylar esasy wagtda jogapsyz 3 gol geçirip, 2 oýnuň netijesi boýunça hasaby deňlediler. Goşmaça wagtda-da her topar 1 gol geçirip, Daniýadaky duşuşygyň hasaby gaýtalandy. Netijede, 11 metrlik urgulardan soň Daniýanyň çempiony, Orhus şäheriniň wekili AGF topary 3-nji saýlama tapgyryna çykmagy başardy.

Türkiýäniň “Fenerbahçe” topary Polşanyň wise-çempiony “Gurnik Zabže” bilen myhmançylykda duşuşdy. “Fenerbahçe” Stambulda Talişkanyň jerime urgusyndan geçiren goly esasynda ýeňiş gazanypdy. Polşadaky oýunda stambullylar ýene-de şol braziliýaly oýunçynyň 12-nji minutda 11 metrlik jerime urgusyndan geçiren goly esasynda öňe saýlandy. Polýaklar Saçegiň 45+10-njy minutdaky goly bilen hasaby deňlese-de, 2-nji ýarymda derwezäni sarsdyran bolmady.

2-nji saýlama tapgyryň netijeleri:

Linkoln Red Imps (Gibraltar) – Mýellbýu (Şwesiýa): 0-0 (0-3), Srwena Zwezda (Serbiýa) – Larn (D. Irlandiýa): 5-0 (4-0), KuPS (Finlýandiýa) – Sabah (Azerbaýjan): 0-2 (0-1), Kauno Žalgiris (Litwa) – KI Klakswik (Farer adalary): 1-0 (0-0), Leh Poznan (Polşa) – AGF (Daniýa): 4-1 (1-4) (3-4 p), Şamrok Rowers (Irlandiýa) – Ararat-Armenia (Ermenistan): 2-1 (0-2), Uniwersitatea Kraiowa (Rumyniýa) – Lewski Sofiýa (Bolgariýa): 2-2 (0-1), Kairat (Gazagystan) – Omoniýa (Kipr): 1-0 (0-1) (6-5 p), Dinamo Zagreb (Horwatiýa) – Tun (Şweýsariýa): 3-2 (g.w.) (1-1), Hapoel Be’er Şewa (Ysraýyl) – Wkingur Reýkýawik (Islandiýa): 2-0 (1-2), Slowan Bratislawa (Slowakiýa) – Iberia 1999 (Gruziýa): 1-1 (2-0), Selýe (Sloweniýa) – Egnatia (Albaniýa): 2-2 (3-3) (4-1 p)

Gurnik Zabže (Polşa) – Fenerbahçe (Türkiýe): 1-1 (0-1), Harts (Şotlandiýa) – Şturm Gras (Awstriýa): 0-2 (0-4)

3-nji saýlama tapgyryň 1-nji duşuşyklary 4-5-nji awgustda, jogap oýunlary bolsa 11-nji awgustda geçiriler. Ýeňiş gazanan toparlar pleý-off tapgyryna çykar.

Dinamo Zagreb (Horwatiýa) – Kauno Žalgris (Litwa)

Mýellbýu (Şwesiýa) – Slowan (Slowakiýa)

Lewski Sofiýa (Bolgariýa) – Kairat (Gazagystan)

AGF (Daniýa) – Sabah (Azerbaýjan)

Ararat-Armeniýa (Ermenistan) – Selýe (Sloweniýa)

Hapoel Be’er Şewa (Ysraýyl) – Srwena Zwezda (Serbiýa)

Olimpiakos (Gresiýa) – NEK (Niderlandlar)

Ýunion Sent-Žilluaz (Belgiýa) – Bude-Glimt (Norwegiýa)

Fenerbahçe (Türkiýe) – Şturm Gras (Awstriýa)

Sparta Praga (Çehiýa) – Lion (Fransiýa)