Özbegistandaky Yslam siwilizasiýasy merkezi dünýäniň iň uly yslam medeniýeti muzeýi hökmünde ykrar edilip, resmi taýdan Ginnesiň rekordlar kitabyna girizildi. 13-nji aprelde geçirilen dabarada Rekordlar kitabynyň wekili Şeýda Subaşy bu merkeziň dünýä ölçeglerine doly laýyk gelýändigini tassyklap, degişli şahadatnamany gowşurdy. Umumy meýdany 50 müň inedördül metre golaý bolan bu äpet toplumyň gümmeziniň beýikligi 65 metre ýetýär.
Prezident Şawkat Mirziýoýewiň başlangyjy bilen 2017-nji ýylda Buharada düýbi tutulan bu merkez diňe bir muzeý däl, eýsem sebitiň iri ylmy-aň-bilim ojagydyr. Häzirki wagtda merkeze her gün ortaça 5 müňe golaý adam zyýarat edýär. Taslamanyň binagärlik aýratynlygy Özbegistanyň gadymy taryhy mirasy bilen döwrebap sanly tehnologiýalaryň sazlaşygyndan ybaratdyr.
Toplumyň iň mukaddes gymmatlygy Gurhan zalynda saklanylýar. Bu ýerde VII asyra degişli bolan we ÝUNESKO-nyň sanawyna giren “Osman Gurhanynyň” asyl nusgasy ýerleşdirilipdir. Mundan başga-da, merkezde yslama çenli döwri, birinji we ikinji Galkynyş eýýamlaryny hem-de Täze Özbegistanyň ösüşlerini görkezýän eksponatlar, wirtual sergiler we ylmy laboratoriýalar bar. Bu halkara abraýly sylag ýüzlerçe hünärmeniň çeken zähmetiniň we ýurduň ylym-bilim ugrundaky täze reformalarynyň ykrarnamasydyr.

Gyzykly bolup bilerЕЩЕ ОТ АВТОРА