UEFA-nyň klublaryň arasynda guraýan 2-nji derejeli ýaryşy Ýewropa Ligasynda täze çempion peýda boldy. Italiýanyň “Atalanta” kluby taryhy başarnyk görkezip, 53-nji gezek geçirilýän ýaryşda kubogy eýelemegi başardy.
“Baýer” hem ýeňilýär
Irlandiýanyň paýtagty Dublindäki “Aviva” stadionynda geçirilen finalda “Atalanta” topary “Baýer” toparyndan 3-0 hasabynda üstün çykdy. Italýan klubunyň doly artykmaçlygynda geçen finalda bergamolylara ýeňiş getiren gollaryň 3-sini hem toparyň nigeriýaly hüjümçisi Ademola Lukman geçirdi. Ol duşuşygyň 12-nji minutynda (Zappakostanyň pasyndan soň), 26-njy minutynda hem-de 75-nji minutda (Skamakkanyň pasyndan soň) tapawutlanyp, toparynyň taryhy ýeňiş gazanmagynda esasy roly oýnady. “Baýer” toparyna italýan klubuna jogap bermek başartmady. Oýnuň 35-nji, 59-njy minutlarynda howply pursatlary döreden nemes klubunyň oýunçylary bu gezek soňky minutlarda ýeňlişden halas bolmak däbini ýöredip bilmediler. “Baýer” topary 51 oýundan soň ýeňlişe sezewar boldy.
Şunlukda, “Atalanta” topary güýçli garşydaşyny 3-0 hasabynda ýeňip, taryhynda ilkinji gezek UEFA-nyň ýaryşlarynyň ýeňijisi boldy. UEFA-nyň bu bäsleşiginde finala çykan 62-nji klub hökmünde hasaba alnan “Atalanta” Ýewropa Ligasynda kubogy eýelän 30-njy topardyr.
UEFA Ýewropa Ligasynyň finaly (22.05.2024)
“Atalanta” – “Baýer”: 3-0
“ATALANTA” (Italiýa): Musso – Džimsiti, Hien, Kolaşinas (Skalwini 46) – Zappakosta (Hatebor 84), Ederson, Koopmeýners, Rujjeri (Toloi 90+1) – De Ketelare (Paşaliç 57), Skamakka (Ture 84), Lukman; Tälimçi: Jan Piero Gasperini (Italiýa)
“BAÝER” (GERMANIÝA): Kowar – Stanişiç (Bonifas 46), Jonatan Ta, Tapsoba – Frimpong (Tella 81), Džaka, Palasios (Andrih 68), Hinkapie – Wirts (Şik 81), Grimaldo (Hložek 69) – Adli; Tälimçi Habi Alonso (Ispaniýa)
EMIN: Iştwan Kowaç (Rumyniýa)
STADION: “Aviva” – Dublin, Irlandiýa
TOMAŞAÇY: 47 135
