Mundan 4 ýyl ozal şu gün, futbolyň ägirdi, ussady, köplerine görä, ähli döwürleriň iň gowy futbolçysy, argentinaly ýyldyz Diego Armando Maradona 60 ýaşynda ýürek bilen baglanyşykly kesel sebäpli Buenos Aýres welaýatynyň Tigr şäherindäki öýünde aradan çykypdy. 1960-njy ýylyň 30-njy oktýabrynda Buenos Aýres welaýatynyň Lanus şäherinde dünýä inen Maradona 1976-njy ýylyň 10-njy oktýabrynda «Argentinios Huniors» (1976–1981) bilen şertnama baglaşýar. Şondan soň, «Boko Huniors» (1981–1982), «Barselona» (1982–1984), «Napoli» (1984–1991), «Sewilýa» (1992–1993), «Newell’s Old Boýs» (1993–1994) we ýene-de «Boko Huniors» (1995–1997) klublarynda oýnaýar. 16 ýaşynda Argentinanyň ýygyndysynyň köýnekçesini geýýär. Milli ýygyndyda 91 oýunda 34 gol geçirýär. 4 Dünýä Kubogynda 21 duşuşykda 8 gol geçirýär. Şol gollaryň 2-si, ýagny 1986-njy ýylda ýarym finalda Angliýanyň ýygyndysynyň derwezesinden geçiren 2 goly futbolyň taryhyna altyn harplar bilen ýazylýar. 4 minutda geçiren bu gollarynyň birinjisini ol eli bilen girizýär. Onuň 2-nji goly, ýagny ýarym meýdançadan alan topy bilen öňüne çykan iňlis futbolçylaryny aldap, derwezä girizen pökgüsi asyryň goly hökmünde ykrar edilýär. Argentinanyň ýygyndysyna Dünýä Kubogynda bir çempionlyk, birem kümüş medal gazandyrýar. 20 ýyllyk futbol karýerasynda 10 kubok gazanan Maradona ýurdunyň «Tekstil Mandiýu», «Rasing Klub», BAE-niň «Al-Wasl», «Fujirah», Meksikanyň «Dorados» toparlarynda gysga möhletlik tälimçi bolýar. 2008–2010-njy ýyllar aralygynda Argentinanyň milli ýygyndysyna tälim berýär. Millionlaryň söýgüsini gazanan Maradona karýerasy boýunça klublarda 588 oýunda 321 gol geçirýär. Maradona Pele bilen bilelikde FIFA tarapyndan XX asyryň futbolçysy diýlip saýlanýar. Özüne mahsus durmuşda ýaşan rowaýaty futbolçy ýüreklerde baky ýaşar.
