Günorta Amerikanyň Çempionlar Ligasy bolan Libertadores Kubogy ýaryşynda çempion belli boldy. Argentinanyň paýtagty Buenos-Aýres şäherindäki meşhur “Monumental” stadionynda oýnalan finalda 2 brazil kluby – “Atletiko Mineiro” bilen “Botafogo” toparlary duşuşdy. Çekeleşikli we dartgynly geçen oýnuň eýýäm 2-nji minutynda “Botafogadan” Gregore eden gödek hereketi üçin gyzyl kart aldy. Oýnuň başynda 1 oýunçy kem galandygyna garamazdan, “Botafogo” topary 35-nji minutda Luis Henrikeniň goly esasynda hasaby açdy. Oýnuň 44-nji minutynda Aleks Telles penaltini dürs urup, hasaby 2-0-a çykardy.

2-nji ýarymyň başynda Eduardo Wargas (47) aratapawudy 1 gola düşürse-de, olara hasaby deňlemek ýa-da öňe saýlanmak başartmady. Duşuşygyň 90+7-nji minutynda bolsa Junior Santos 3-nji pökgini “Atletiko Mineironyň” derwezesinden geçirip, oýna soňky nokady goýdy. Bu onuň ýaryşdaky 10-njy goly bolup, ol iň köp gol salan oýunçylaryň sanawynda birinji orny eýeledi. Şunlukda, 3-1 hasabynda ýeňiş gazanan “Botafogo” topary taryhynda ilkinji gezek Libertadores Kubogynyň ýeňijisi boldy.

“Botafogo” topary bu kubogy eýelän 27-nji klub, şol bir wagtyň özünde-de 12-nji brazil kluby hökmünde hasaba alyndy. “Botafogo” topary gelejk ýylky FIFA Klublar arasy Dünýä Kubogyna gatnaşjak iň soňky klub bolup, ýaryşyň toparçalarynyň bijeleri 5-nji dekabrda çekiler.

Gyzykly bolup bilerЕЩЕ ОТ АВТОРА