Formula 1 boýunça Dünýä çempionatynyň möwsümdäki 5-nji ýaryşy Beýik Britaniýanyň Silwerstoun şäherçesinde geçirildi. Şäherçäniň adybir trassasynda geçirilen ýaryşda “Red Bull” toparynyň golland sürüjisi Maks Werstappen ýeňiji boldy. Ol 52 aýlawy 1 sagat 19 minut 41,993 sekuntda tamamlap, şu möwsümdäki ilkinji, karýerasyndaky 9-njy ýeňşini gazandy. Werstappenden 11,3 sekunt yza galan britaniýaly Lýuwis Hamilton (“Mercedes”) 2-nji ýeri eýeledi. Hamilton 155-nji gezek münbere çykyp, Mihael Şumaheriň rekordyny gaýtalady. Bäsleşige ilkinji hatardan başlan “Mercedes” toparynyň fin sürüjisi Waltteri Bottas 3-nji bolup, ýaryşy tamamlady. Geçirilen 5 ýaryşdan soň, Lýuwis Hamilton 107 utuk bilen 1-nji orny eýeleýär. Bu ýeňişden soň, 2-nji orna çykan Maks Werstappeniň 77, 3-nji ýerdäki Waltteri Bottasyň 73 utugy bar. Möwsümiň nobatdaky ýaryşy 16-njy awgustda Ispaniýanyň Barselona şäherinde geçiriler.
