Günleriň bir güni giň sährada açlykdan ýaňa eňkamy giden bir möjek çopana gabat gelip, ondan iýmäge bir zatlar sorapdyr. Çopanyň oňa rehimi inip, iýip oturan çöreginden bir döwüm bölüpdir-de, ony möjege uzadypdyr. Möjek:
– Be.. Ynsan iýmitiniň tagamyna baksana. Eger biziň üçin hem şeýle tagamly hörek bolsady, onda sürä degmesek hem degmezdik – diýip, çopana hyýrsyz nazaryny aýlap, şeýle diýen:
– Ýogsa-da, siz muny nähili taýýarlaýarsyňyz?
– Gardaş, bu uzyn hekaýat. Onuň üçin ozaly bilen, ýeri sürmeli… – diýip, çopanyň gürrüň bermäge başlany hem şol eken welin möjek onuň sözüni bölüp:
– Onsoň iýibermelimi? – diýip, özelenipdir.
– Ýok, dursana, soňra bugdaý tohumyny ekmeli… – diýip, çopan sözüni dowam etdirmekçi bolanda, ýene-de möjek onuň sözüniň arasyny kesip:
– Onsoň iýibermelimi? – diýip sorapdyr. Çopan gyzyp:
– Dursana how entek, gürrüňiň yzyny aýtmaga goýmadyň-a, aýtdyma saňa hekaýatyň uzakdygyny – diýipdir.
Soňra çopan bugdaýa nädip ideg etmelidigini, ormalydygyny, döwmelidigini, elemelidigini, üwemelidigini, hamyr ýugrup, tamdyrda ot ýakyp, çörek ýapyp, bişirmelidigini… garaz baryny birin-birin gürrüň beripdir.
– Onsoň iýibermelimi? – diýip, möjek ýene şol bir ýüregedüşgünç soragyny gaýtalap, şeýle diýen:
– Adamlaryň iýmiti niçiksi datly, ýöne onuň zähmeti uçursyz kän eken. Eger beýle bolsa, biz siziň süriňize degmän oňup biljek däl öýdýän – diýip, ol ýerden garasyny saýlamak bilen bolupdyr.
Adamzat durmuşynyň bütin manysy halal zähmetden hem-de onuň rehnet-hözirinden ybaratdyr. Adaty elektrik çyrasynyň ýa-da krandan akýan suw akymynyň aňyrsynda hem giden zähmet ýatyr. Şoňa görä, özgeleriň zähmetine sarpa goýuň! Durmuşda iň haýyrly iş öz zähmetiňdir. Diňe ejeň ýuwan geýim-gejimleri aňsat hapalanýar. Özüň ýuwup-ütüklän eşigiňizi hapalasyňyz gelýan däldir.
