Ispaniýanyň çempionaty La Ligada 15-nji tapgyryň merkezi oýnunda sanawyň lideri Real Madrid öz meýdançasynda Sewilýany kabul etdi. Çekeleşikli geçen oýunda myhmanlar 12-nji minutda Rafa Miriň goly bilen öňe saýlandy. Madridliler bu gola 20 minutdan soň Karim Benzema bilen jogap berdiler. Oýnuň tamamlanmagyna 3 minut galanda-da, Winisius Junior Reala ýeňiş getiren futbolçy boldy. Şeýlelikde, Real Madrid soňky 8 oýunda 7-nji gezek ýeňiş gazandy. Duşuşykda bir gezek tapawutlanan Karim Benzema diňe klublary hasaby alanyňda 361-nji goluny geçirdi. Şeýlelikde, Benzema klublarda iň köp gol geçiren fransiýaly futbolçy rekordynyň täze eýesi boldy. Bu ugurda ozalky rekordyň eýesi Tierri Anri bolup, ol çykyş eden klublarynda 360 gol geçiripdi.
