“Altyn top” baýragynyň gowşurylan agşamynda diňe bu sylag berilmän, beýleki ugurlarda-da ýylyň tapawutlananlaryny “France Football” žurnaly sylaglandyrdy.
7-nji gezek “Altyn top” baýragyny asmana göteren Lionel Messi muny PSŽ-niň adyndan alan ilkinji futbolçy boldy. Dabarada PSŽ-niň ýene bir futbolçysy, şeýle-de Barselonanyň iki oýunçysy beýleki baýraklary eýelediler. Mahlasy, PSŽ bilen Barselona klublary dabaranyň ýeňijileri boldy.
Zenanlaryň arasynda “Altyn top” baýragyna Barselona toparynyň ispaniýaly ýyldyzy Aleksiýa Putelýas mynasyp boldy (186 utuk). Ol bu ugurda topardaşy Jennifer Hermoso (84) hem-de Çelsiniň awstraliýaly oýunçysy Sem Kerrden (46) öňe saýlandy. Bu baýrak 3-nji gezek gowşuryldy.
Edil bu baýrak ýaly 3-nji gezek gowşurylýan “Kopa Trophy” baýragyna-da ispaniýaly Pedri mynasyp boldy. Ýylyň iň ökde ýaş futbolçysyna berilýän bu baýragy gazanan golaýda 19 ýaşyny dolduran Pedri (89) angliýaly Jud Bellingam (39) hem-de germaniýaly Jamal Musialadan (38) tapawutlanmagy başardy.
Rowaýaty futbolçy, “Altyn topy” alan ýeke-täk derwezeçi Lew Ýaşiniň adyny göterýän “Yashin Trophy” baýragy Italiýanyň ýygyndysynyň Ýewropa çempiony bolmagynda uly rol oýnan Janluiji Donnarumma gowşuryldy (594 utuk). 2-nji berilýän sylagy almak ugrunda ol Çelsiniň senegally derwezeçisi Eduard Mendiden (404) hem-de Atletikonyň sloweniýaly derwezeçisi Ýan Oblakdan (155) öňe saýlandy.
Geçen möwsüm Altyn topy gowşurylmandygy sebäpli alyp bilmedik Robert Lewandowski bu ýylyň iň esasy dalaşgärlerinden diýlip görkezilýärdi. Ýöne ol ýene-de Altyn to
py gazanyp bilmedi. Žurnal oňa ýylyň hüjümçisi baýragyny gowşurdy.
Kot-d’Iuwarly ozaly futbolçy Didie Drogbanyň hem-de fransuz žurnalisti Sendi Heriberiň bilelikde alyp baran dabarasynda Çelsi ýylyň topary diýlip saýlandy.
