Ispaniýanyň çempionaty La Liganyň 18-nji tapgyrynda ligada galmak üçin göreşýän iki toparyň – Granada bilen Malýorkanyň duşuşygynda ýer eýeleri 4-1 hasabynda ýeňiş gazandy. Andalusiýalylara ýeňiş getiren gollaryň üçüsini Horhe Molina öz adyna ýazdyrdy. 39 ýaşyndaky (39 ýaş 241 gün) ispan hüjümçisi 20-nji, 61-nji we 90+1-nji minutlarda tapawutlandy. Şeýlelikde, ol La Ligada het-trik eden iň ýaşuly futbolçy rekordynyň täze eýesi boldy. Bu ugurda ozalky rekord 38 ýaş 140 gün bilen Hoakine degişlidi. Bu rekord diňe bir La Liganyň rekordy bolman, eýsem, Ýewropanyň öňdebaryjy 5 çempionatynyň hem iň ýokary görkezijisi boldy. Ýewropanyň TOP 5 çempionatynda het-trik eden iň ýaşuly futbolçy argentinaly hüjümçi Rodrigo Palasio degişli bolup, ol geçen möwsüm Bolonýanyň düzüminde toparynyň Fiorentina garşysyna geçiren oýnunda 3 gezek tapawutlanypdy. Häzirki wagtda Serie B-niň Breşiýa toparynda oýnaýan Palasio 39 ýaş 89 gün bilen rekordy täzeläpdi.
