Şu gije futbol duşuşyklarynyň iň naýbaşysy hasaplanýan El Klasiko duşuşygy geçiriler. Ýylyň ilkinji El Klasiko duşuşygy Saud Arabystanynyň paýtagty Er-Riýad şäherinde oýnalar. Ispaniýanyň Super Kubogy ýaryşynyň çäklerinde geçiriljek bu oýun Aşgabat wagty bilen 00:00-da başlar. Barselona bilen Real Madridiň arasynda bu oýunda ýeňiş gazanan topar finalda ertirki boljak Atletiko Madrid bilen Atletik Bilbaonyň arasyndaky duşuşygyň (00:00) ýeňijisi bilen duşuşar. Bu günki duşuşyga Hose Luis Munuera Montera eminlik eder. Final duşuşygy 16-njy ýanwarda geçiriler. Duşuşyklaryň üçüsi-de Er-Riýaddaky Şa Fahdyň adyny göterýän halkara stadionda oýnalar.
Real Madrid 100-nji ýeňşine garaşýar
Bu gijeki Barselona bilen Realyň arasyndaky oýun 248-nji resmi, umumylykda 281-nji El Klasiko bolar. Mundan öňki resmi oýunlary hasaba alanymyzda, Real 99, Barselona 96 gezek ýeňiş gazandy. 52 duşuşyk deňlikde tamamlandy. Barselona Realy 2019-njy ýylyň martyndan bäri ýeňmek başardanok. Çempionatdaky soňky 5 duşuşygyň 4-sinde Real ýeňiş gazanyp, 1 oýun golsuz tamamlandy.
Täze formatda 3-nji möwsüm
Adatça Super Kubogy duşuşyklarynda ýurduň çempiony bilen Kubogynyň eýesi duşuşýar. Ýöne 3 möwsümden bäri Ispaniýada çempion hem-de Kubogyň eýesinden daşgary wise-çempion bilen Kubogyň finalçysy hem gatnaşyp, kiçeňräk ýaryş hökmünde geçirilýär. Şeýle formatda ilkinji gezek 2019-njy ýylda Saud Arabystanynda geçirilen Ispaniýa Super Kubogy bäsleşigi geçen ýyl pandemiýa sebäpli Ispaniýanyň çäginde guralypdy we Atletik Bilbao finalda Barselonany goşmaça wagtda ýeňipdi.
