Ispaniýanyň çempionaty “La Ligada” 28-nji tapgyryň soňky duşuşygynda “Real Madrid” myhmançylykda “Malýorkany” 3-0 hasabynda ýeňdi. Sanawyň liderine ýeňiş getiren gollary Winisius Junior (55) bilen Karim Benzema (77 p, 82) geçirdi. Birinji goluň hem pasyny beren Benzema duşuşygyň ýyldyzy boldy. Utugyny 66-a çykaran “Real Madrid” ikinji basgançakdaky “Sewilýadan” 10 utuk öňe saýlandy.
Soňky 2 duşuşykda 3 gol geçiren Karim Benzemanyň karýerasyndaky gollarynyň sany 413-e ýetdi. Şeýlelikde, ol 411 golly Tierri Anriden öňe saýlanyp, iň köp gol geçiren fransuz futbolçysy bolmagy başardy. Benzemanyň çempionatdaky gollarynyň sany-da 22-ä ýetip, ol 11 goluň hem pasyny berdi. Benzema şu möwsümde Realyň adyndan 32 gol geçirip, ol karýerasynyň iň ýokary netijesini gaýtalady.
La Ligada Real Madrid indiki tapgyrda öz meýdançasynda bir oýny kem 51 utuk bilen 3-nji orunda barýan Barselonany kabul eder.
