Fransiýanyň çempiony PSŽ-de tälimçi çalyşdy. Klub argentinaly Maurisio Poçettinony topar üçin bitiren hyzmatlary sebäpli minnetdarlyk bildirip, oňa gelejekde uly üstünlikler arzuw edip, ony wezipesinden boşatdy. 2021-nji ýylyň ýanwarynda wezipä bellenen Poçettino kluba Fransiýanyň Kubogyny, Super Kubogyny hem-de “Ligue 1”-iň çempionlygyny gazandyrdy. Poçettinonyň 2023-nji ýylyň tomsuna çenli şertnamasy bardy.
PSŽ topary Poçettinonyň ornuna bellenen täze tälimçisini hem dessine mälim etdi. Geçen möwsümde “Nissa” toparyna tälim beren 55 ýaşyndaky fransiýaly hünärmen Kristof Galtie toparyň tälimçiligine bellendi. Ol parižliler bilen 2 ýyllyk şertnama baglaşdy. Galtie karýerasy boýunça “Sent-Etien” (2009 –2017), “Lill” (2017 – 2021) hem-de “Nissa” (2021 – 2022) toparlaryna tälim berdi. “Lill” toparyny 2020/21 möwsüminde “Ligue 1”-de çempion eden Galtie geçen möwsümde “Nissany” Fransiýanyň Kubogy ýaryşynyň finalyna çykardy. “Nissa” topary çempionaty 5-nji orunda tamamlady.
