Niderlandlaryň çempionaty «Eredivisie»-niň soňky çempiony «Aýaks» şu transfer möwsüminde başda tälimçisi bilen bir hatarda, esasy düzüminden 5 oýunçyny başga klublara ugratdy. Häzirki wagtda bolsa olaryň öwezini dolmagyny dowam edýär. Alfret Shroderi tälimçilige bellän klub soňky 3 günde 3 oýunçy bilen şertnama baglaşdy.
Amsterdamlylar ilki «Reýnjersden» nigeriýaly goragçy Kalwin Bassini 23 million ýewro transfer etdi. «Reýnjersiň» taryhyndaky transfere goýberen iň gymmat oýunçysy bolan 22 ýaşly Bassini «Aýaks» bilen 5 ýyllyk şertnama baglaşdy. «Reýnjers» Bassinini 2020-nji ýylda «Lester Sitiden» transfer edipdi.
Bu transferden soň «Aýaks» topary «Portodan» Fransişko Konseýsaony düzümine goşdy. 19 ýaşly winger bilen 5 ýyla niýetlenen şertnama gol çekişen «Aýaks» oýunçynyň transfer tölegi hökmünde-de 5 million ýewrony «Porto» toparyna berer. Fransişko «Porto» toparynyň tälimçisi, ozalky meşhur futbolçy Seržio Konseýsaonyň ogly bolup, ol 2 möwsümden bäri portugal klubunyň esasy düzüminde çykyş edip gelýärdi.
«Aýaksyň» soňky 3 gündäki 3-nji transferi-de ozalky oýunçysy Braýan Brobbi boldy. «Leipsigden» transfer edilen 20 ýaşly hüjümçi 2027-nji ýyla çenli amsterdamlylaryň düzüminde oýnar. Öz akademiýasynyň uçurymy bolan niderland futbolçy üçin «Aýaks» topary «Leipsige» 16,35 million ýewro, şeýle-de, goşmaça ýene-de 3 million ýewro tölär. Brobbi şu ýylyň ýanwar aýyndan bäri «Aýaksda» kärendesine çykyş edip gelýärdi. «Leipsig» topary Brobbini 2021-nji ýylyň martynda tölegsiz düzümine goşupdy. Brobbi «Aýaksda» möwsümiň 2-nji ýarymynda 11 duşuşykda 7 gol geçiripdi.
«Aýaks» topary bu 3 oýunçydan öňem «Tottenhamdan» hüjümçi Stiwen Bergweýni (31,2 million ýewro) hem-de «AZ Alkmaardan» goragçy Owen Wiýndaly (10 million ýewro) transfer edipdi.
5 esasy oýunçysyny ugratdy
«Aýaks» topary bolsa düzümindäki esasy oýunçylaryndan Nuassir Mazrauini «Bawariýa» (tölegsiz), derwezeçi Andre Onanany «Intere» (tölegsiz), Raýan Grawenberhi «Bawariýa» (18,5 million ýewro), hüjümçi Sebastian Halleri «Borussiýa Dortmunda» (31 million ýewro), goragçy Lisandro Martinesi «Mançester Ýunaýtede» (57,3 million ýewro) ugradypdy. Şeýle-de, toparyň ozalky tälimçisi Erik ten Hag bolsa «Mançester Ýunaýtediň» tälimçiligine bellenipdi.
