Futbol oýnundaky iň esasy zatlaryň biri gazanylýan üstünlikde, gowy görkezijilerde yzygiderliligi saklamak bolup, bu juda kyn iş. Şol sebäpli-de gowy görkezijiler babatda yzygiderlilik hemişe hemme futbolça miýesser edenok. Ýöne muňa garamazdan, käbir futbolçylara gowy görkezijiler boýunça yzygiderliligi saklamak kyn hem bolsa başardýar. Şolaryň biri-de “La Liganyň” wekili Bilbao şäheriniň Atletik toparynyň ispaniýaly futbolçysy Iniaki Williams bolup, ol 7 ýyla golaý wagtdan bäri çempionatda bir duşuşyk hem goýbermän oýnap gelýärdi. Williams şol döwürde ne jerime, ne-de şikes aldy. Ýazylmadyk kanuna görä, diňe basklylaryň çykyş edýän bu klubunda Iniaki Williams “Atletikde” 2014-nji ýyldan bäri oýnaýar. Ol 2014/15 möwsüminde 19, 2015/16 möwsüminde-de 25 oýunda meýdança çykdy. Şol 25 duşuşygyň soňky 5-sini yzygiderli oýnap, ondan öňki 20 oýunda käbir duşuşyklary goýberipdi. Şol möwsümde ol 33-nji tapgyrda, ýagny 2016-njy ýylyň 7-nji aprelinde “Malaganyň” garşysyna geçirilen duşuşykda oýnamandy. Asly ganaly bolan Iniaki Williams şol günden soň klubunyň “La Ligadaky” ähli duşuşygynda meýdança çykdy. Bu ýagdaý tä şu möwsümiň 19-njy tapgyryndaky “Selta Wigo” duşuşygyna çenli dowam etdi. Ýagny Williamsyň Onuň bu täsin rekordy 6 ýyl 9 aý 22 gün diýlende tamamlandy. Bu duşuşykdan öň Ispaniýanyň Şa Kubogy ýaryşynda “Walensiýa” garşy 3-1 ýeňen “Atletik” toparynyň 2 golunyň pasyny hem beripdi. Ýöne şondan garaşylmadyk ýagdaýda myşsalarynda emele gelen agyry oňa indiki oýunda ätiýaçda-da oturmagyna päsgel berdi. 28 ýaşyndaky hüjümçi “La Ligada” 251 oýun yzly-yzyna oýnap, çempionatyň rekordyny ep-esli ösdürdi. Ondan öň Antonio Larranýage 202 oýun bilen rekordyň eýesidi. “La Ligadan” aşaky liga düşmedik 3 klubuň biri bolan “Atletik Bilbao” toparynyň ýyldyzy 2015/16 möwsüminde 5, 2017/18 möwsüminden 2021/22 möwsümine çenli her möwsümde 38, bu möwsümde-de 18 – jemi bassyr 251 duşuşyk geçirdi. Ol şolaryň käbirinde ätiýaçdan oýna girenem bolsa, umumylykda esasy düzümde meýdança çykdy (2018/19 möwsüminde 36 oýunda esasy düzümde meýdança çykdy). Iniaki Williams şol 251 oýunda 50 gol geçirip, 51 goluň pasyny berdi. Iniaki Williams derwezeçi bolman Ýewropanyň öňdebaryjy çempionatlarynda yzygiderli iň köp duşuşyk geçiren futbolçy rekordyny-da geçen ýylyň güýz aýlarynda täzeläpdi. Bu ugurda ozalky rekordy germaniýaly goragçy Manfred Binza degişli bolup, ol “Bundesligada” 1980-nji ýyllaryň 2-nji ýarymynda hem-de 1990-njy ýyllaryň 1-nji ýarymynda “Aýntraht” toparynda 246 oýny goýbermän meýdança çykdy.
Rekord 442 oýun bilen Sepp Maýere degişli
Umumylykda Ýewropanyň öňdebaryjy 5 çempionatynda bu ugurdaky rekord hem germaniýaly derwezeçi Sepp Maýer degişlidir. 1962-1980-nji ýyllarda “Bawariýanyň” derwezesini goran rowaýaty derwezeçi şol ýyllarda 13 möwsüm ýeke oýun hem goýbermedi. Häzirki wagtda 78 ýaşynda bolan derwezeçi yzly-yzyna 442 “Bundesliga” duşuşygynda meýdança çykyp, gaýtalanmasy juda kyn rekordy go
ýupdy. Angliýanyň “Premier Ligasyndaky” rekord hem derwezeçä degişli bolup, amerikaly Bred Fridel APL-de yzly-yzyna 310 oýunda “Bläkbörn”, “Aston Willa” hem-de “Tottenham” toparlarynyň derwezesini gorady. Fransiýanyň çempionaty “Ligue 1”-iň rekordynyň eýesi özüniň tutuş karýerasyny diýen ýaly “Oser” toparynda geçiren fransiýaly derwezeçi Fabien Kul bolup, ol bassyr 307 duşuşykda meýdança çykdy. Italiýanyň çempionaty “Serie A”-da rekord rowaýaty derwezeçi Dino Zoffa degişlidir. Edil Sepp Maýer ýaly 28-nji fewralda doglan 80 ýaşyndaky derwezeçi 11 ýyllap 330 oýunda “Ýuwentusyň” derwezeni gorady. Ol jemi 332 duşuşyk (“Napolide” hem 2 oýun) bilen rekordyň eýesidir.
