Tennis boýunça möwsümiň 4-nji “Uly tuwulga” ýaryşy “Amerika Açykda” zenanlaryň arasynda finala çykanlar belli boldy. Ýarym finalda ýer tennisçilerden üstün çykan gazagystanly Ýelena Rybakina bilen belarusly Aryna Sabalenka finalda duşuşarlar.

Ýarym finalda sanawyň täze birinji belgili tennisçisi Rybakina amerikaly Koko Gauff bilen duşuşdy. 1-nji setde 6:3 asgyn gelen Rybakina 2-nji setde 6:4 üstün çykdy. 3-nji setde-de 6:4 ýeňiş gazanan Rybakina karýerasy boýunça “Amerika Açykda” ilkinji gezek, umumylykda-da 3-nji sapar “Uly tuwulgada” finala çykdy.

Beýleki ýarym final duşuşygynda sanawyň öňki birinji belgilisi Sabalenka amerikaly Jessika Pegulany ýeňmek kyn düşmedi. 1-nji setde 7:5 ýeňiş gazanan Sabalenka 2-nji setde 6:2 hasap bilen garşydaşyny utdy. 2024-nji we 2025-nji ýyllaryň çempiony Sabalenka “Amerika Açykda” bassyr 4-nji gezek finala çykmagy başardy. Ol 2023-nji ýylda finalda ýeňlipdi. Sabalenka umumylykda 9-njy gezek finalda oýnar.

“Amerika Açykda” ýarym finalda 1975-nji ýyldan bäri ilkinji gezek sanawyň öňdäki 4 tennisçisi duşuşdy. “Uly tuwulgalarda” bolsa soňky sapar 2009-njy ýylda “Wimbledonda” sanawyň öňdäki 4 tennisçisi ýarym finala adyny ýazdyrypdy.

Rybakina bilen Sabalenkanyň arasyndaky final duşuşygy şenbeden ýekşenbä geçilýän gije oýnalar. Bu olaryň öz arasyndaky 3-nji “Uly tuwulga” finaly bolup, olar mundan öň “Awstraliýa Açykda” 2 gezek duşuşypdylar. 2023-nji ýylda Sabalenka, 2026-njy ýylda, ýagny şu ýylyň başynda-da Rybakina ýeňiş gazanypdy.

Gyzykly bolup bilerЕЩЕ ОТ АВТОРА