Gazagystan ekologiýa deňagramlylygy dikeltmek we durnukly syýahatçylygy ösdürmek maksady bilen, 2035-nji ýyla çenli milli seýilgähleriniň meýdanyny 20 müň inedördül kilometre çenli giňeltmegi meýilleşdirýär. Şunlukda, ýurduň goralýan tebigy zolaklarynyň umumy meýdany 332 müň inedördül kilometre ýetip, Polşanyň ýa-da Italiýanyň tutýan meýdanyndan hem geçer. Bu başlangyç “Biologik köpdürlüligi gorap saklamagyň we durnukly peýdalanmagyň 2026–2035-nji ýyllar üçin konsepsiýasynyň” bir bölegi bolup, ol Aralkum çöllüginden Alatau daglaryna çenli bolan üýtgeşik landşaftlary gorap saklamagy, şeýle-de 8 müň inedördül kilometr meýdanda täze tokaýlyklary döretmegi göz öňünde tutýar.
Bu giň gerimli meýilnama diňe bir tebigaty däl, eýsem, sebitiň syýahatçylyk mümkinçiliklerini hem täze derejä çykarar. Taslamanyň çäklerinde Iler-Alatau we Kölsaý kölleri ýaly künjeklerde syýahatçylar üçin täze wiza merkezleri, glampingler (amatly çadyr düşelgeleri), pyýada we atly gezelenç ugurlary dörediler. Şeýle-de, ekologik obalary ösdürmek we ýörite hünärmenleri taýýarlamak arkaly ýabany tebigata, guşlara syn etmek we dag ýörişleri ýaly ekosyýahatçylyk ugurlaryna itergi berler. Bu çäreler häzirlikçe sany az bolan daşary ýurtly syýahatçylaryň we başdan geçirmeleri söýüjileriň ünsüni çekmäge gönükdirilendir.
Mundan başga-da, Gazagystan özüniň baý haýwanat dünýäsini goramak üçin düýpli ädimleri ädýär. Häzirki wagtda ýurtda ösümlikleriň 6 müňden gowrak, haýwanlaryň bolsa 230-a golaý görnüşi bar. Esasan hem, ýitip gitmek howpy astyndaky gar barsy, buhara suguny we jeren ýaly jandarlary gorap saklamak, şeýle-de gaplaňlary, gulanlary we Pržewalskiniň atlaryny gaýtadan ýabany tebigata uýgunlaşdyrmak işleri alnyp barlar. Aral deňziniň guran düýbünde sazak ekmek arkaly ekoulgamy dikeltmek işleri hem durnukly syýahatçylygyň ösmegine goşant goşar.

Gyzykly bolup bilerЕЩЕ ОТ АВТОРА