“Mukaddeslige tagzym” sahna oýnunyň ilkinji görkezilişi

28-nji fewralda Türkmenistanyň Beýik Saparmyrat Türkmenbaşy adyndaky Baş drama teatrynda Gahryman Arkadagymyzyň “Enä tagzym – mukaddeslige tagzym” kitabyndan täsirlenip Kerim Atçapanow tarapyndan ýazylan pýesa esasynda sahnalaşdyrylan “Mukaddeslige tagzym” atly sahna oýnunyň tomaşaçylar köpçüligine ilkinji görkezilişi boldy.
Türkmenistanyň halk artisti Gülälek Akmyradowanyň režissýorlygynda taýýarlanan bu sahna oýny teatr muşdaklary, halk köpçüligi we ýaşlar tarapyndan gyzgyn garşy alyndy.
Baş keşpleri teatryň ussat artistleri Jennet Paltaýewa (Mährem ene), Şemşat Hojyýewa (Göwher), Begenç Garlyýew (Arslan) Orazgeldi Durdyýew (Wepa Nuryýewiç), Aýnabat Silapowa (Näzik eje), Bilbil Baýramowa (Maral eje) we beýleki artistler ýerine ýetirip, tomaşaçylaryň gyzgyn söýgüsine mynasyp boldular. Oýnuň saz bezegini Şatlyk Amannepesow, yşyk bezegini Mekan Ilamanow ýerine ýetiripdir. Suratkeş Güljemal Saparowa sahnanyň bezeg işlerinde yhlasyny gaýgyrmandyr.
8-nji mart “Halkara zenanlar gününe” bagyşlanan bu sahna oýnunda enelere hormat, olaryň perzentlerine tükeniksiz söýgüsi we çagalary üçin hemme zada taýýardygy çeperçilik bilen beýan edilýär. Teatryň zehinli režissýory Gülälek Akmyradowa eseriň ruhy dünýäsine çuňňur aralaşyp, ony tomaşaçylara täsirli ýetirip bilmegi başarypdyr. Bu oýun her bir adamyň durmuşynda enäniň ähmiýetini, olara hormat goýmagyň her bir adamyň mukaddes borjudygyny ýatladýar.
Arslan ýokary okuw mekdebini gutarandan soň, şol ýerde galyp, şäherli gyz Göwhere öýlenýär. Gyzyň kakasy Wepa Nuryýewiç bolsa, ony öz ýanyna işe ýerleşdirýär. Netijede, Arslan şäherden jaý satyn alýar, ulag edinýär. Indi Arslan ejesine seýrek jaň edýärdi. Günleriň bir güni Arslanyň ejesi Mährem ene täze dünýä inen agtygyny ýüzüne sylmak üçin obadan şähere gelýär. Gaýnenesini sowuk-sala garşy alan Göwher soňabaka ownuk-uşak zatlar üçin onuň üstüne abaýlap, kemsidip ugraýar. Maşgalada emele gelen ýagdaý Arslan bilen Göwheriň özara gatnaşyklarynyň çylşyrymlaşmagyna sebäp bolýar. Şeýle ýagdaýda Arslan “iki oduň arasynda galsa-da”, maşgala meselesinde oba durmuşynda öz maşgalasynda öwrenen gymmatlyklaryna eýerýär. Ýagdaýlar ýetjek derejesine ýetende, sabyr käsesi dolan Arslan gelniniň ýüzüne bir şarpyk çalýar. Bu bolsa garaşylmadyk ýagdaýlara sebäp bolup, şol wagt gapydan Göwheriň kakasy Wepa Nuryýewiç girýär-de, haýal etmän gyzyny öýüne alyp gaýdýar. Bu pursat maşgaladaky düşünişmezligiň iň ýokary derejesine öwrülip, tomaşaçylarda maşgala gatnaşyklary, birek-birege düşünişmek barada çuňňur pikirleri oýarýar. Göwher atasy öýüne gelenden soň Wepa Nuryýewiçiň ejesi Näzik eje meseläniň änigine-şänigine ýetip, Göwheri aklyna aýlaýar. Spektaklyň ahyrynda başga-da birnäçe syrlaryň üstüniň açylmagy sahna oýnunyň iň gyzykly taraplarynyň biridir.
Bu oýunda diňe bir maşgala gatnaşyklarynyň çylşyrymlydygy baradaky meseleler gozgalman, eýsem, ynsan duýgulary hem içgin açylyp görkezilýär. Şeýle hem barlyşygyň we özara düşünişmegiň ýollaryny tapmagyň möhümdigi salgy berilýär. Dürli dramatik usullary we güýçli duýguly pursatlary ulanyp, Gülälek Akmyradowa tomaşaçylaryň ýüreginde çuňňur yz galdyrýan sahna eserini döretmegiň hötdesinden gelipdir.
Mährem enäniň agtygynyň keşbinde sahnada ilkinji gezek çykyş eden Maýsa Akmyradowanyň çykyşy üns berilmäge mynasypdyr. Onuň çykyşy sahna oýnunyň hakyky wakasyna öwrülip, ýokary aktýorlyk ukybyny ýüze çykaryp tomaşaçylaryň şowhunly el çarpyşmalaryna sebäp boldy. Bu premýera onuň üçin diňe bir döredijilik karýerasyndaky möhüm ädim bolman, eýsem, tomaşaçylaryň hemmesiniň ýadynda galan maşgala durmuşynyň täsirli pursatyna öwrüldi.
Spektaklyň esasy ajaýyp aýratynlygy bolsa, tomaşaçylaryň ýüreginde öz eneleri baradaky iň çuňňur duýgulary, olaryň tükeniksiz söýgüsi we wepadarlygy baradaky ýatlamalary oýarmagydyr. “Mukaddeslige tagzym” diňe bir spektakl däl, eýsem, eneler baradaky hakyky waspnama bolup, her bir adamyň durmuşynda eneleriň ähmiýetiniň uludygyny we beýikdigini görkezýär.
“Mukaddeslige tagzym” pýesasynyň premýerasy ýurdumyzyň teatr durmuşynda möhüm waka bolup, biziň her bir birimize enelerimize hormat goýmalydygymyzy, olaryň biziň üçin bitiren işlerine ýokary baha bermelidigimizi ýadymyza salýar. Bu sahna oýny ähli döwürlerde çynlakaý mesele bolup durýan maşgala mukaddesliginiň we söýginiň gadyr-gymmatyna düşünmäge çagyryşdyr.