Şu gün, 13-nji martda “Garagum” myhmanhanasynda Türkmenistanyň saýlawlary we sala salşyklary geçirmek boýunça merkezi toparyň metbugat ýygnagy geçirildi. Maslahata daşary ýurtlaryň habarlar gulluklarynyň wekilleri, ýurdumyzda akkreditirlenen daşary ýurtly žurnalistler, şeýle hem ýurdumyzyň köpçülikleýin habar beriş serişdeleriniň wekilleri gatnaşdylar.

Merkezi saýlaw toparynyň başlygy Gulmyrat Myradow Türkmenistanyň Prezidentiniň saýlawlaryna ses berlişigiň 12-nji martda 19:da tamamlanandygyny, şeýle hem daşary ýurtlardaky ilçihanalarda we konsullyk gulluklarynda döredilen käbir saýlaw uçastoklarynda ses berlişigiň şu gün ýapylandygyny mälim etdi. Merkezi saýlaw toparynyň başlygy Türkmenistanyň Prezidentiniň saýlawlaryna syýasy partiýalaryň we raýatlaryň teklipçi toparlarynyň jemi 9 dalaşgäri hödürländiklerini aýdyp, dalaşgärler üçin deň şertleriň döredilendigini, olaryň maksatnamalaryny beýan etmek boýunça ähli mümkinçiligiň berlendigini belledi. G.Myradow saýlaw uçastoklaryna barmaga mümkinçiligi bolmadyk saýlawçylaryň ses bermekleri üçin hem şertleriň döredilendigini aýtdy. Merkezi saýlaw toparynyň başlygy saýlawlara GDA, ŞHG, Türki Döwletleriň Guramasy ýaly halkara guramalaryndan köp sanly halkara synçylaryň hem gatnaşandygyny aýan etdi.

G.Myradow ýurdumyz boýunça jemi 3 million 460 müň 80 saýlawçynyň hasaba alnandygyny, olaryň 99 müňüsiniň ilkinji gezek ses bermäge hukuk gazanandygyny habar berdi. Maglumatlara görä, jemi 3 million 32 müň 52 saýlawçy ses bermäge gatnaşdylar. Netijede, saýlawlara gatnaşyk 97,17 göterim bolupdyr.

G.Myradow saýlawlaryň deslapky netijeleriniň ertir mälim boljakdygyny aýtdy.

ЭТО МОЖЕТ БЫТЬ ИНТЕРЕСНОЕЩЕ ОТ АВТОРА